Итали улс нь дэлхийн хамгийн их жуулчин зорьж очдог улс орнуудын нэг. Тэр дундаа усан дээр оршдог Венец хот жилийн аль ч үед жуулчдын хөлд дарагдсан байдаг юм. Тэгвэл тус хотын захиргаанаас жуулчдын урсгалыг багасгахын тулд ирэх оны 6-р сараас эхлэн 25 болон түүнээс дээш тооны бүрэлдэхүүнтэй жуулчны багийг хүлээн авахгүй гэдгээ мэдэгдсэн байна. Түүнчлэн жуулчдын баг бүрэлдэхүүнийг чанга яригчаар хөтөч хийн дагуулж явахыг хориглосон байна. Энэ хот жуулчдын урсгалыг багасгахаар олон янзын арга хэмжээ авдаг болсон. Өнгөрсөн оны 9-р сард тус хотыг үзэж сонирхохоор ирсэн жуулчид өдрийн 5 еврогийн такс төлдөг байх төлбөрийн системийг боловсруулж, баталсан байна.

Венец жижиг газар нутагтай ч ирэх жуулчдын тоо хэт их байдгийн улмаас дуу чимээ, ус хөрсний бохирдол нь зохих хэмжээнээс хэтэрсэн гэж тус хотынхон тайлбарладаг. 2019 онд гэхэд энэ хот 19 сая жуулчин хүлээн авч байжээ.