рванхоёрдугаар сарын 17-нд ойрын зайн пуужин туршсан Умард Солонгос өнөө өглөө дахиад Пёньяны бүс нутгаас зүүн тийш алсын тусгалтай баллистик пуужин харвасан гэж Өмнөд Солонгосын батлан хамгаалах яамнаас мэдэгдлээ. Өмнөд Солонгосын цэргийн шинжээчдийн үзэж байгаагаар уг пуужин нь хатуу түлшээр ажилладаг тив хоорондын, баллистик ангиллын Хвасонг-18 пуужин байж магадгүй юм байна. Хөрш Өмнөд Солонгос, Японы аль аль нь Умардын энэхүү туршилтыг олон улсын хууль зөрчлөө гэж буруутгаж байна.

Энэ нь Умард Солонгос сүүлийн таван сард тив хоорондын баллистик пуужин туршсан анхны тохиолдол харин сүүлийн 24 цагт хоёр дахь удаагийн туршилт болж байна. Умардын нийслэл орчмоос өнөөдөр өглөөний 8:24 минутын орчимд нийслэл хотын чиглэлээс пуужин харвасан, уг пуужин далайд унахаасаа өмнө 1000 орчим километр зам туулсан гэж Өмнөдийн батлан хамгаалах яам тооцоолжээ. Сөүл пуужингийн мэдээллээ Япон, АНУ-тай хуваалцсан байна. Өмнөд Солонгосын ерөнхийлөгчийн тамгын газар Үндэсний аюулгүй байдлын зөвлөлөө хуралдуулж, хариу арга хэмжээний талаар хэлэлцсэн байна. Пёньян 4, 7-р сард олборлодог түлшээр ажилладаг тив хоорондын ангиллын пуужин туршсан. Олборлодог түлшээр ажилладаг пуужингууд нь шингэн түлш хэрэглэдэг пуужингуудаас илүү хурдан өндрөө авах боломжтой юм байна. НҮБ-аас баталсан удаа дараагийн тогтоолуудаар Умард Солонгос цөмийн зэвсэг тээх чадалтай, тив алгасагч баллистик пуужин турших нь хориотой байдаг. Энэ сарын эхээр АНУ-Өмнөд Солонгосын цөмийн асуудлаарх зөвлөлдөх зөвлөлийн төлөөлөгчид Пентагонд уулзалт хийж, ирэх оны дундуур цөмийн стратегийн хамтарсан удирдамж боловсруулахаар тохиролцсон. Ойр ойрхон туршилт хийж байгаа нь тус улсын цөмийн аюул заналхийллийг нь таслан зогсооход чиглэсэн АНУ, Өмнөд Солонгосын цөмийн тогтоон барих хүчээ нэмэгдүүлэх тохиролцоог эсэргүүцэж байгаагаа харуулахад чиглэсэн байж магадгүй гэж ажиглагчид үзэж байна.