Томуу, томуу төст өвчний идэвхжлийн үеийн нөхцөл байдлын талаар ЭМЯ- наас мэдээлэл хийлээ.

Хэвлэлийн бага хуралд Эрүүл мэндийн дэд сайд С.Энхболд, ХӨСҮТ-ийн Ерөнхий захирлын албан үүргийг хавсран гүйцэтгэгч Ж.Байгалмаа, Нийслэлийн эрүүл мэндийн газрын дарга П.Эрхэмбулган, ZINT эмнэлгийн ерөнхий эмч Т.Навчаа нар оролцож, нийслэлд болон улсын хэмжээнд томуу, томуу төст өвчний нөхцөл байдал, эмнэлгийн тусламж үйлчилгээнд тулгарч буй асуудлын талаар мэдээлэл хийж, ханиад томуугаас сэргийлэх зөвлөгөө зөвлөмжийг өгөв.

ДЭЛХИЙ ДАХИНД:

Томуугийн вирусийн идэвхжил дэлхийн бөмбөрцгийн хойд хагасын улс орнуудад ялангуяа Европ, Төв Ази, Хойд Америк, Зүүн болон Баруун Азийн улс орнуудад нэмэгдэж байна. Тухайлбал, АНУ-д томуу, томуу төст өвчин, амьсгалын замын цочмог халдвар нэмэгдэж, улирлын босго үзүүлэлтээс давсан байгаа бол Зүүн Азийн орнууд болох БНХАУ, БНСУ-д өвчлөл тогтвортойгоор нэмэгдэж байна.

Дэлхий дахинд улирлын томуугийн болон SARS-CoV-2 вирус эргэлтэнд байна. Дэлхийн 122 Томуугийн үндэсний төвөөс ирүүлсэн 301,639 сорьцонд шинжилгээ хийхэд, томуугийн А хүрээний А(H3N2) болон А(H1N1) вирус давамгайлан илэрсэн байна.

МАНАЙ УЛСЫН ХУВЬД:

2023 оны 49 дүгээр долоо хоног буюу 12 дугаар сарын 4-10-нд улсын хэмжээнд амбулаториор нийт 274,525 хүн үйлчлүүлснээс 19,484 тохиолдол буюу 7.1 хувь нь томуу, томуу төст өвчний тохиолдол байгаа нь өмнөх долоо хоногтой хрьцуулахад 1.5 хувиар их, харин өмнөх оны мөн үетэй харьцуулахад 1.2 хувиар бага байна. Нийт түргэн тусламжийн дуудлагын 23.7 хувийг томуу, ТОМУУ ТӨСТ ӨВЧИН эзэлж байгаа нь өнгөрсөн долоо хоногоос 4.5 хувиар, өмнөх оны мөн үеэс 7.4 хувиар тус тус нэмэгдсэн байна.

Улсын хэмжээнд томуу, томуу төст өвчний тархалтыг 5 түвшинд авч үздэг бөгөөд одоогийн байдлаар 2-р түвшин буюу “Идэвхжлийн түвшин”-д 14 аймаг (Баян-Өлгий, Баянхонгор, Говь-Алтай, Дорноговь, Дорнод, Дундговь, Завхан, Орхон, Өвөрхангай, Өмнөговь, Сэлэнгэ, Увс, Ховд, Хөвсгөл) байгаа бол Улаанбаатар хот болон 7 аймаг (Архангай, Говьсүмбэр, Булган, Дархан-Уул, Сүхбаатар, Төв, Хэнтий) 3-р түвшин буюу “Алаг цоог дэгдэлтийн түвшин”-д байна.

Энэ жилийн хувьд улирлын томуугийн А хүрээний (H3N2) хэв шинжийн вирус, амьсгалын замын синцитиаль вирус, риновирус, SARS-CoV-2 вирус давхар эргэлтэд байгаа нь бага насны хүүхэд хүндрэх эрсдэлийг нэмэгдүүлж байна.

Томуугийн харуулдан тандалтын мэдээгээр 21 аймаг, 8 дүүргийн нэгдсэн эмнэлэг болон төрөлжсөн мэргэшлийн эмнэлгүүдэд нийт 8,854 хүн эмнэлэгт хэвтэн эмчлүүлж байгаагаас 2,294 буюу 25.9 хувь нь амьсгалын замын цочмог хүнд халдвартай байгаа нь өмнөх долоо хоногтой харьцуулахад 3.8 хувиар нэмэгдсэн байна.

Томуу томуу төст өвчний улмаас эмнэлэгт хэвтэн эмчлүүлэгчдийн 91.4 хувь нь 15 хүртэлх насны хүүхэд, үүнээс 80 хувь нь 4 хүртэлх насны хүүхэд байна.

Сүүлийн 7 хоногийн байдлаас харахад 12 дугаар сарын 10-ны өдрийн байдлаар нийслэлийн хэмжээнд томуу, томуу төст өвчний улмаас 1892 хүүхэд хэвтэн эмчлүүлж байсан бол 12 дугаар сарын 17-ны байдлаар 2300 болж, 500 гаруй хүүхдээр нэмэгдсэн дүнтэй байна.

Олон улсын судалгаануудаас харахад томуугаар өвдөх эрсдэл агаарын хэм буурахад 11 хувиар, харьцангуй чийгшил буурахад 58 хувиар тус тус нэмэгддэг бөгөөд хүйтэн цаг агаартай улс орнууд эмнэлгийн тусламж, үйлчилгээний бэлэн байдлыг хангах, дархлаажуулалт, амны хаалт хэрэглэх, гарын эрүүл ахуйг сахих, ханиад томуутай үед сургууль цэцэрлэгт явахгүй, гадагш гарахгүй гэртээ байх зэрэг эрүүл дадал хэвшлийг төлөвшүүлэхэд анхаарч ажилладаг байна.

2023 оны 12 дугаар сарын 15-ны өдрийн байдлаар нийслэлийн хэмжээнд Эх, нярай, эмэгтэйчүүдийн үндэсний төв, Халдварт өвчин судлалын үндэсний төв, Улсын хоёрдугаар төв эмнэлэг, Төрийн тусгай албан хаагчдын Нэгдсэн эмнэлэг болон 9 дүүргийн хэмжээнд хүүхдийн тусламж үйлчилгээнд нэмэлтээр 1153 ор дэлгэсэн бөгөөд нийт хүүхдийн орны тоо 2172 байна. Орны ачаалал 112.8 хувьтай байна.

Одоогоор тасалдсан эм, тариа байхгүй ба эмнэлгүүд 30 хүртэлх хоногийн нөөцтэй байна.

Томуу, томуу төст өвчний тархалт нэмэгдэж байгаатай холбогдуулан дараах арга хэмжээг авч, хэрэгжүүлж байна. Үүнд:

-Томуугийн эсрэг вакцинаар 2-5 хүртэлх насны хүүхэд, жирэмсэн эмэгтэйчүүд, 65 болон түүнээс дээш насныхан, архаг хууч өвчтэй хүн болон эрүүл мэндийн байгууллага, хүчний байгууллагын ажиллагсад зэрэг эрсдэлт бүлгийн хүн амын 91.7 хувийг вакцинжуулалтад хамруулаад байна. -Томуу, томуу төст өвчний идэвхжлийн үед хариу арга хэмжээ авах, бэлэн байдлыг хангах чиг үүрэг бүхий Эрүүл мэндийн дэд сайдаар ахлуулсан “Шуурхай удирдлагын баг”-ийг байгуулан, томуу, томуу төст өвчний өвчлөлийн зүй тогтол, хандлага, тархалт, вирусийн хувилбарыг тогтоож, бэлэн байдал, хариу арга хэмжээний заавар, журмыг хэрэгжүүлж, нөөцийн бэлэн байдлыг хангаж, иргэдэд чиглэсэн өвчлөлөөс сэргийлэх мэдээлэл, сургалт сурталчилгааг эрчимжүүлэн, олон нийтийн мэдээллийн сувгуудаар түгээн ажиллаж байна. Нийслэлийн хэмжээнд дүүргийн нэгдсэн эмнэлэг болон зарим төрөлжсөн мэргэшлийн эмнэлгүүдийн томуу, томуу төст өвчний эмнэлгийн тусламж үйлчилгээний нөхцөл байдалтай газар дээр нь танилцаж, дэмжлэгт хяналтыг хийж байна.

-Амбулаторийн тусламж, үйлчилгээг уртасгасан цагаар үзүүлэх, өрхийн эрүүл мэндийн төвийг амралтын өдрүүдээр ажиллуулах, гэрийн эргэлтийг идэвхжүүлэх зохицуулалтыг хийж байна.

-Өвөлжилт хүндэрч болзошгүй газар нутгийн хүн амын эрүүл мэндэд учирч болзошгүй эрсдэлээс урьдчилан сэргийлэх, отор нүүдлээр явж буй малчдад эрүүл мэндийн тусламж, үйлчилгээ үзүүлэх зорилгоор төрөлжсөн мэргэшлийн төв эмнэлэг, тусгай мэргэжлийн төв, аймаг, нийслэлийн эрүүл мэндийн газрын дарга, захирал нарт Эрүүл мэндийн сайдын 2023 оны 11 дүгээр сарын 16-ны өдрийн 06 дугаар албан даалгавраар үүрэг чиглэлийг өгч ажиллаж байна.

Нийслэлийн эрүүл мэндийн газрын 50 дугаар долоо хоногийн мэдээгээр нийслэлийн хэмжээнд амбулаторийн 95 823 үзлэг хийгдсэнээс томуу, томуу төст өвчний 10 890 тохиолдол оношлогдсон буюу нийт үзлэгийн 11.4 хувийг эзэлж байна. Энэ нь өнгөрсөн 7 хоногийн дунджаас 2.9 хувиар өссөн, өнгөрсөн оны мөн үеийн түвшингээс 3.3 хувиар тус тус буурсан үзүүлэлттэй байна. Нийт өвчлөгсдийн 25 хувийг 0-1 нас, 28.4 хувийг 2-4 нас, 20.3 хувийг 5-9 нас, 13.1 хувийг 10-15 насны хүүхдүүд эзэлж байна. Хүүхдийн түргэн тусламжийн 3877 дуудлага ирснээс 53.6 хувь нь томуу, томуу төст өвчин байна.