Нийслэлийн засаг дарга Х.Нямбаатар өнөөдөр буюу арваннэгдүгээр сарын 22-нд цаг үеийн талаар мэдээлэл хийлээ.Тэрээр "Нийслэлийн ИТХ хуралдаж төсвийн тодотгол хийсэн. Энэ үеэр цөөнхийн бүлгээс таван толгой түлш, компанийн хэрэглэгчдэд үйлчлэх төвөөс хэд хэдэн санал ирсэн. Өнөөдөр Улаанбаатар хотод зуухаа солихгүй бол болохгүй 82,500 айл өрх байна. Өдөр болгон дуудагдаж байгаа угаарын дуудлагуудыг очиж үзэхэд дандаа зуух нь салсан, цоорсон, ул ширэм нь цөмөрсөн байдалтай байна. Энийг шинэчлэхгүйгээр бид агаарын бохирдолтой тэмцэх, цаашлаад хүний амь насыг аюулгүй байлгах боломжгүй гэдэг саналыг дэвшүүлсэн. Ингээд зуух шинэчлэх төсөл гаргасан. Үүний 20 мянган зуухыг нь Эрчим хүчний яаманд байгаа чадалд тааруулж 1,7 кВт буюу ус буцалгагчтай ижил хэмжээнд ажилладаг цахилгаан зуухыг нээлттэй тендер зарлаж шалгаруулна. Шаардлага хангахгүй байгаа үлдсэн зуухыг нь нийслэлээс айл өрхүүдэд шинэчлэнэ. Нийслэл, хороо, өрх гэсэн гурвалсан гэрээгээр иргэдэд өгнө. Айл өрхийн шилжилт хөдөлгөөний мэдээлэл хороонд бүртгэлтэй байхаар зохицуулалт хийж ажиллана. Харин үлдсэн айлуудын сайжруулан солих зуухны үндсэн стандартыг шинжлэх ухааны академи, химийн хүрээлэнгээс бичгээр авна. Мөн давхар шаталттай угаарын хийгээ дахин шатаадаг зуухны тендер шалгаруулж авна".

-Шахмал түлшний үйлдэвэрлэлтэнд технологийн алдаа байна гэсэн мэдээллийн тухайд?

-Өчигдөр энэ тухай Ц.Даваацэрэн захирал мэдэгдэл хийсэн. Ц. Даваацэрэн захирлаас тодруулга аваарай. Мидлингийг авчраад нунтаглаад, ургамлын гаралтай барьцалдуулагч ашиглан бүтээгдэхүүнээ үйлдвэрлэж байгаа гэж хэлсэн. 96 хувийн мидлинг, дөрвөн хувийн ургамлын гаралтай барьцалдуулагч ашигладаг гэсэн. Одоогоор Нийслэлд Эрдэнэс Таван толгой түлш компани шилжиж ирээгүй байна.Тус компанийг шилжүүлж авах тохиолдолд Эрчим хүчний сайд, Эрдэнэс Монголын захирлуудад дараах саналыг хүргүүлсэн.

• Өмнөх өр авлагыг, нийслэл хариуцахгүй
• Баруун хоёр үйлдвэрийг бүрмөсөн хааж, зөвхөн Налайхын үйлдвэрт нийслэл ажиллах
• Уг компанийг шилжүүлж авсан тохиолдолд дотоод бүтцэд нь өөрчлөлт оруулна

Мөн одоо Нийслэлд үйл ажиллагаа явуулдаг уурын зуухны захирлуудыг хүлээн авч, уулзахаар болсон. Үндсэн утаа үйлдвэрлэдэг 81 зуух нэг жилдээ 110 мянган тонн түүхийн нүүрс хэрэглэдэг. Энэ газруудад нийслэлээс дэмжлэг үзүүлж, ширэм болон зуух солиулах талаар хэлэлцэнэ" гэлээ.