Чингис хаан Үндэсний музейн VIII давхарт Монголын анхны панарома дэлгэц бүхий музейн виртуал өрөө үзэгчдийг хүлээн авахад бэлэн болжээ.

Их эзэн Чингис хаан мэндэлсэн өвлийн тэргүүн сарын шинийн 1 буюу Монгол бахархлын өдөр 11-р сарын 14-н-д тохионо. Монгол бахархлын өдрийг тохиолдуулан нээж буй Виртуал өрөөний нээлтээр “Жаргал продакшн”-ий бүтээсэн “Их Монгол улсын эзэн хаан: Чингис” контентийг анх удаа хүргэхэд бэлэн болжээ. 

Эзэн Чингис хааны дүр төрхийг синематик анимэшн зураглалаар бодит мэт бүтээж, Тэмүжин Чингис хааны мэндэлсэн 1162 оны өвлийн тэргүүн сараас 1206 онд Их Монгол Улсыг байгуулсан үе хүртэлх түүний амьдрал, үйл хэргийн түүхийг 15 минутад багтаасан байна.

Чингис хаан үндэсний музей “ГлобалСмарт Сольюшн” ХХК-тай хамтран дэлхийн стандартад нийцсэн музейн виртуал өрөөг Монголдоо анхлан тохижуулж, Япон улсын Panasonic брэндийн проектор болон линз, Герман улсын Neumann брэндийн “Дольби 7,1” дуугаралтын систем, Dataton брэндийн Watchout сервер зэрэг хамгийн сүүлийн үеийн дэвшилтэт техник технологиор иж бүрэн тоногложээ. Уг виртуал өрөөнд стандарт видеог 10 дахин томруулсантай тэнцэхүйц өндөр нягтаршил бүхий дүрслэлийг үзүүлснээр үзэгчдэд бодит мэт мэдрэмж төрүүлнэ хэмээн Чингис хаан музейгээс мэдээллээ.