Тайланд улсад өнгөрсөн тавдугаар сард болсон бүх нийтийн сонгуульд сөрөг хүчний намууд үнэмлэхүй ялалт байгуулсан.

Шинээр сонгогдсон хууль тогтоогчид сонгуулийн санал хураалтаас хойш 50 хоногийн дараа анхны чуулганаа хийж байна.

Тайландын парламент буюу үндэсний ассамблейн чуулганаар хэлэлцэх гол асуудал нь Танхимын дарга болон Ерөнхий сайдыг томилох асуудалд төвлөрч байна.

Тайланд улс нь үндсэн хуультай, хаант засагтай. Парламент буюу үндэсний ассамблей нь сенатын болон төлөөлөгчдийн гэсэн дээд, доод хоёр танхимтай. Өнгөрсөн тавдугаар сард болсон бүх нийтийн сонгуулийн санал хураалтаар Төлөөлөгчдийн танхим буюу Доод танхимын 500 гишүүнийг ард түмний санал болон намын жагсаалтаар сонгосон.

Олон улсын ажиглагч шинжээчдийн хувьд эвслийн Засгийн газар байгуулагдах яриа хэлэлцээ сунжрах төлөвтэй байна. Энэ тодорхойгүй байдал нь Тайландын эдийн засагт сөрөг нөлөө учруулж болзошгүй гэж сануулж байна.

Өнөөдрийн чуулганаар Төлөөлөгчдийн танхимын даргын санал хураалт болох төлөвтэй байна. Сая болсон сонгуульд Тайландын сөрөг хүчний "Урагшаа" нам парламентад хамгийн олон буюу 151 суудал авсан. Харин сөрөг хүчний хамгийн том нам болох Пе Тай нам 141 суудал авсан.

Сөрөг хүчний намын удирдлагууд өнгөрсөн Ням гарагт хуралдаж энэ асуудлыг хэлэлцсэн нь тодорхой үр дүнд хүрээгүй байна. "Урагшаа" намын хувьд тогтвортой эвслийн Засгийн газар байгуулж чадна гэж үзэж байна.

Учир нь тус намын найман намтай хамтарсан эвсэл парламентад нийт 312 суудалтай, энэ нь тус намын хувьд зорилгодоо хүрэхэд томоохон түлхэц үзүүлэх болов уу гэж ажиглагчид харж байна.

Хэрвээ Доод танхимын даргын суудлын төлөөх сөргөлдөөн хурцадвал хоёр танхимд олонхын санал авах шаардлага үүсэх юм байна.

Энэ нь парламентад хамгийн олон суудал авсан сөрөг хүчний хоёр намын хувьд Ерөнхий сайдыг томилох үйл явцад нөлөө үзүүлж магадгүй гэж дотоодынх нь хэвлэлүүд мэдээлж байна.