Жил бүрийн арваннэгдүгээр сарын 01-ний өдрийг Монгол улс нэг нэгэндээ хайр энэрэл, урам зориг, сэтгэлийн дэм өгөх "Үндэсний өгөх өдөр” болгон тэмдэглэсээр арван дөрвөн жил болж байна.

Технологиор хүүхдээ хамгаалж, хүүхэд бүрт хайр түгээн, хором бүрт  анхаарал хандуулж хамгаалж байх зорилгоор ЦХХХЯ, И-Монгол академи, ХХЗХ хамтран төрийн мэдээлэл солилцооны нэгдсэн систем E-Mongolia платформд “Ekids” үйлчилгээг нэвтрүүлээд 2 долоо хоног өнгөрч байна. Эцэг эхчүүд  хүүхдээ хянах, хөдөлгөөн, байршлыг нь тодорхойлох, яаралтай үед SOS дуудлага дохио илгээх, мэдээлэл солилцох, хүүхэд хамгааллын чиглэлд урьдчилан сэргийлэх мэдээ, мэдээлэл түгээх боломжийг бүрдүүлсэн билээ.

Одоогоор E-Mongolia платформ 1.6 сая хэрэглэгчтэй ч хоёр долоо хоногийн өмнө ашиглалтад орсон “Ekids” үйлчилгээнд бүртгүүлсэн 11802 хүүхэд байгаа нь хангалтгүй тоо юм. Иймээс “Үндэсний өгөх өдөр”-ийг тохиолдуулан УИХ-ын гишүүн, ЦХХХ-ны сайд Н.Учрал, УИХ-ын гишүүн Б.Баярсайхан, тус өдрийг санаачлагчдын нэг СГЗ, Шог зураач С.Цогтбаяр нар хүүхэд хамгааллын бодит шийдэл “Ekids”-ийг хүүхэд бүрийн төлөө эцэг эхчүүдийг хэрэглэхийг уриалж хүүхдийн төв номын санд “ХҮҮХДЭДЭЭ ХАЙР ӨГЬЕ, ХОРОМ БҮРТ АНХАААРЪЯ" Ekids арга хэмжээг зохион байгууллаа.

Мөн Ekids цэсэд нэмэлтээр цахим орчны хүүхэд хамгаалал, яаралтай тусламж авах, гэмт хэргээс урьдчилан сэргийлэх зэрэг заавар зөвлөгөө байршуулан  гэнэтийн болзошгүй аюул учрахад яаралтай тусламжийн 102, 103, 108 утаснуудад шууд дуудлага хийх, эцэг эхдээ мэдэгдэл илгээх боломж бүрджээ.

Ekids цэсээр дамжуулан хүүхэд гадуурхалт, цахим дарамт зэрэг гэмт үйлдлүүдэд өртсөн бол мэдээллийг Цагдаагийн ерөнхий газарт мэдэгдэх боломжтой болжээ.