Эрдэмтэн, судлаачид лхагва гарагт НҮБ, улс орнуудын удирдагчид болоод эрүүл мэндийн салбарын эрх баригчдад хандаж уриалга дэвшүүллээ.

Уур амьсгалын өөрчлөлт, байгалийн гамшиг дэлхий нийтийн эрүүл мэндийн салбарт тулгамдсан гол аюул гэж зарлахыг тэд уриалж байна.

Анагаах ухаан, эрүүл мэндийн чиглэлээр дагнасан 200 гаруй сэтгүүл нэгэн зэрэг, хүн төрөлхтнийг мөхөл сүйрлээс аврахын тулд хамтран шийдвэрлэх ёстой болж байгаа онцгой аюул бол цаг уурын өөрчлөлт, байгалийн гамшиг юм гэдгийг ДЭМБ-аас зарлан тунхаглахыг уриалсан байна.

Энэ хоёр асуудлыг ирэх 11 дүгээр сард Дубайд чуулах уур амьсгалын асуудлаарх НҮБ-ын 28-р бага хурал буюу "СОР28" чуулган, мөн ирэх 2024 онд Турк улсад чуулах Биологийн олон төрөл зүйлийг хадгалж хамгаалах асуудлаарх "СОР16" бага хурлаар тус тус авч хэлэлцэх юм.

Энэ хоёр бага хурлын холбогдолтой судалгаа шинжилгээний ажлууд дор бүртээ тусдаа явагддаг. Гэхдээ хоёр баг 2020 онд хамтарсан зөвлөгөөн хийж асуудлыг нэгдмэл цогцоор шийдвэрлэх шаардлагатай гэдэг дүгнэлтэд хүрчээ.

“Уур амьсгал, биологийн олон төрөл зүйлийг хамгаалах гэдэг хоёулаа нэг л цогц асуудлын хоёр тал юм гэдгийг ойлгож, хүлээн зөвшөөрснөөр дасан зохицох аргагүй нөхцөл үүсэхээс зайлсхийж, ашиг тустай үр нөлөөг нэмэгдүүлэх шийдлүүд боловсруулж чадах юм” гэдэгт тэд санал нэгдсэн байна.

Байгаль, цаг уурын өнөөгийн хямрал хүмүүсийн эрүүл мэндэд шууд болон шууд бусаар нөлөөлж, хүнс, ус зэрэг амин хэрэгцээнд мөн нөлөөлж, байгалийн цочир үзэгдлүүд, өвчин гэхчилэн эрсдэлүүд нэмэгдэх шалтгаан болж байгааг НҮБ-ын тайлан илтгэлд мөн дурдсан юм байна.

Энэ илтгэлийг НҮБ-ын дэргэдэх судалгааны байгууллага НҮБ-ын их сургуулийн эрдэмтэн, судлаачид боловсруулсан.

“Байгальгүйгээр хүмүүс оршин амьдрахгүй” гэдгийг НҮБ-ын Ерөнхий нарийн бичгийн дарга Антонио Гутерреш өнгөрсөн онд хэлж байсан.

Мөн биологийн олон төрөл байдлыг хамгаалах бага хурлаас 2030 он гэхэд дэлхийн хуурай газар, далай тэнгис, тэдгээрийн эрэг хавийн 30 хувийг унаган төрхөөр нь хадгалж, хамгаалах зорилтыг 2020 онд дэвшүүлж байсан.

Түүнчлэн хөгжингүй орнууд уур амьсгалын асуудлаарх бага хурлаар өмнө хүлээсэн үүргээ биелүүлэх хүрээндээ бусад улс орнуудад жил бүр 30 тэрбум ам.доллар олгож байх үүрэг хүлээсэн байдаг.

Гэвч эдгээр амлалт зорилтууд өнөө хэр хэрэгжээгүйн улмаас дэлхийн олон нийтийг “эргэлт гаргахаас аргагүй” байдалд түлхэн оруулж байгааг илтгэл боловсруулагчид анхааруулж, биологийн олон янз байдлыг сэргээх, уур амьсгалын өөрчлөлттэй тэмцэх зорилтыг нэгдмэл цогц байдлаар шийдвэрлэх нь урагшлах цор ганц арга зам гэдгийг мөн цохон заасан байна.