НҮБ-ын Аюулгүйн Зөвлөлийн 10 дугаар сарын дарга Бразил Улсын санаачилгаар энэ 10 дугаар сарын 25-ны өдөр Эмэгтэйчүүд, энх тайван, аюулгүй байдал сэдвийн хүрээнд “Эмэгтэйчүүдийн олон улсын энх тайван, аюулгүй байдалд оролцох оролцоо: Онолоос практикт шилжих нь” нээлттэй хэлэлцүүлгийг зохион байгуулав.

Бразил Улсын Гадаад хэргийн сайд Мауро Виейрагийн удирдан явуулсан эл хэлэлцүүлгийн эхэнд НҮБ-ын Ерөнхий нарийн бичгийн дарга Антонио Гутерреш, НҮБ-Эмэгтэйчүүд байгууллагын Гүйцэтгэх захирал Сима Бахус, Олон улсын улаан загалмайн хорооны дарга Мирьяна Спольярич болон Бразил, Африкийн холбооны иргэний нийгмийн байгууллагын төлөөлөл оролцож, үг хэлэв.

Нээлттэй хэлэлцүүлэгт Монгол Улсаас НҮБ-ын дэргэд суугаа Байнгын төлөөлөгч В.Энхболд оролцож, үг хэлэв. Байнгын төлөөлөгч хэлсэн үгэндээ НҮБ-ын Аюулгүйн Зөвлөл 1325 тоот тогтоолыг 2000 онд баталснаар эмэгтэйчүүдийн энх тайван, аюулгүй байдлын  асуудал дахь оролцоо нэмэгдсэнийг тэмдэглэж, үүнийг улам бүр нэмэгдүүлэх хэрэгцээ шаардлага байгааг онцлов.

Тэрбээр Монгол Улс эмэгтэйчүүдийн улс төр, шийдвэр гаргах түвшний оролцоог дэмжих төдийгүй эрх зүйн орчныг бүрдүүлэх, эдийн засгийн хувьд чадавхжуулах чиглэлээр хөгжлийн бодлого, хөтөлбөрүүд боловсруулан хэрэгжүүлж байгаа талаар танилцуулав. Түүний дотор эмэгтэйчүүдийн улс төрийн сонгуульд нэр дэвших квотыг 30 хувь болгон нэмэгдүүлсэн, өнгөрсөн 6 дугаар сард Улаанбаатар хотноо Гадаад хэргийн эмэгтэй сайд нарын уулзалтыг амжилттай зохион байгуулсан, мөн Монгол Улс НҮБ-ын Энхийг сахиулах үйлсэд оролцож буй эмэгтэй цэргийн алба хаагчдын тоогоо үе шаттайгаар нэмэгдүүлэн ажиллаж байгаа зэргийг цохон тэмдэглэв.

Нээлттэй хэлэлцүүлэгт 90 гаруй гишүүн улсын төлөөлөгчид, түүний дотор Алжир, Гватемал, Люксембург, Индонез, Өмнөд Африк, Сент Винсент ба Гренадин зэрэг улс Гадаад хэргийн сайдын, Ардчилсан Конго, Колумб, Тонга зэрэг улс нийгмийн хөгжил, эмэгтэйчүүд, дотоод хэргийн асуудал эрхэлсэн сайдын, Гүрж, Словени, Украйн зэрэг улс дэд сайдын түвшинд тус тус оролцож, үг хэлжээ.