Монгол Улсын Ерөнхийлөгч У.Хүрэлсүхийн Бүгд Найрамдах Франц Улсад хийж буй төрийн айлчлалын хүрээнд 10 дугаар сарын 11-ний өдөр Парис хотноо “Монгол-Францын Бизнес форум”-ыг зохион байгуулав.

Тус форумыг Монгол Улсын Ерөнхийлөгч У.Хүрэлсүх нээж хэлсэн үгэндээ Монгол Улс нь хөрөнгө оруулалтын орчныг сайжруулах, эрх зүйн орчныг тогтвортой болгох, гадаадын хөрөнгө оруулалт татах, хөрөнгө оруулагчийн эрх, хууль ёсны ашиг сонирхлыг хамгаалах чиглэлд холбогдох хууль эрх зүйн орчны шинэчлэл хийж буйг онцлоод Монгол Улсад хөрөнгө оруулалт хийх сонирхолтой францын байгууллагатай идэвхтэй хамтран ажиллахад бэлэн байгаагаа илэрхийлэв.

Түүнчлэн БНФУ-ын Жижиг дунд үйлдвэрлэл, худалдаа, гар урлал, аялал жуулчлалын сайд хатагтай Оливия Грегоре тус форумыг нээж хэлсэн үгэндээ Монгол Улсын Ерөнхийлөгчийн энэхүү айлчлал, Бизнес форумын өргөн оролцоо нь хоёр талын улс төрийн харилцааг эдийн засгийн хамтын ажиллагаа болгон өргөжүүлж, харилцааны цоо шинэ хуудас нээж байгааг онцлон тэмдэглэсэн юм.

“Францын Аж ахуйн нэгжүүдийн хөдөлгөөн” /Медеф интернэйшнл/ байгууллага, Монгол Францын Бизнес зөвлөл болон Монголын үндэсний худалдаа, аж үйлдвэрийн танхим хамтран зохион байгуулсан тус форумд хоёр талын аж ахуйн нэгжийн 170 орчим төлөөлөгч оролцож, Монгол Улсын эдийн засгийн өнөөгийн байдал, хөрөнгө оруулалтын орчны талаар мэдээлэл өгч, хоёр улсын хооронд хөдөө аж ахуй, мал аж ахуй болон сэргээгдэх эрчим хүч зэрэг салбарт хамтран ажиллах боломжийн талаар францын бизнес эрхлэгч, хөрөнгө оруулагч нарт дэлгэрэнгүй танилцуулав.

БНФУ-ын талаас Орано майнинг, Талес, Дассо систем, Пома зэрэг компаниуд үйл ажиллагаагаа танилцуулж, монголын талтай хамтран хэрэгжүүлж буй төслүүд болон цаашдын хамтын ажиллагааны боломжийн талаар танилцууллаа.
Тус форумын төгсгөлд МҮХАҮТ болон “Францын Аж ахуйн нэгжүүдийн хөдөлгөөн” /Медеф интернэйшнл/ байгууллагын хооронд хамтын ажиллагааны баримт бичигт гарын үсэг зурж, хоёр талын бизнесийн төлөөлөгчид чөлөөт уулзалт хийж, худалдаа, хөрөнгө оруулалт, хамтын ажиллагааны талаар санал солилцов.