Жил бүрийн аравдугаар сарын хоёр дахь пүрэв гарагийг Дэлхийн эрүүл мэндийн байгууллага, Cохролоос урьдчилан сэргийлэх олон улсын агентлаг болон төрийн бус байгууллагууд хамтран хараагүй болохоос урьдчилан сэргийлэх талаар олон нийтэд мэдээлэл олгох, тус асуудалд анхаарал хандуулах өдөр болгон тэмдэглэдэг.

Дэлхийн хараа хамгаалах өдөр энэ жил аравдугаар сарын 12-нд тохиож байна. 

Статистик судалгаанаас харахад дэлхийн гурван хүн тутмын нэгнийх нь хараа муу байдаг аж. Энд компьютерийн үүрэг нэлээд байгаа. Иймд нүдийг хамгаалах, хараа муудахаас сэргийлдэг, хараа тогтоодог комплекс дасгалуудыг байнга хийж сурах нь хамгийн ухаалаг шийдэл болно. Дасгалуудыг өдөрт хоёроос цөөнгүй удаа хийнэ. Хослуулж хийвэл бүр ч сайн. Нэг комплексийг хийхэд ердөө 5 минут л хангалттай.

1-р Комплекс: Хараа сайжруулах цогц дасгалууд. Нэг дасгалыг 6-аас доошгүй удаа давтана.

• Нүдийг баруун зүүн тийш хөдөлгөнө.
• Нүдийг дээш доош нь хөдөлгөнө.
• Нүдээ нар зөв болон нар буруу эргэлдүүлнэ.
• Нүдээ хурдан, эрчимтэй анивчина.
• Зүүн доод булан руугаа хараад шууд дээшээ эгцлэн харна. Дараа нь нөгөө талдаа давтана.
• Нүдээ хооронд нь ойртуулна.
• Ойр ойрхон анивчих.
• Оффисынхоо цонхонд дөхөж очоод эхлээд цонхон дээрх жижиг зураас эсвэл ойр байгаа зүйлийг ширтээд дараа нь харцаа алсад байгаа байр, уул гэх мэт зүйлс рүү шилжүүлнэ.

2-р Комплекс: Холын хараа муудахаас сэргийлэх цогц дасгал:

• Сандлын түшлэгийг налан хойшлохдоо амьсгаа аваад дараа нь урагш тонгойхдоо амьсгаагаа гаргана.
• Сандлынхаа түшлэгийг налаад нүдээ чанга аниад дараа нь нээнэ.
• Гараа ташаандаа аваад толгойгоо баруун тийш эргүүлээд баруун тохойгоо харна. Дараа нь зүүн талдаа давтана.
• Дээш хараад нүдээ нар зөв болон буруу эргэлдүүлнэ.
• Гараа урагш сунгаад хурууныхаа үзүүрийг ширтэнэ. Гараа дээш өргөхдөө амьсгаа аваад толгойгоо өргөлгүйгээр хурууны хөдөлгөөнийг дагуулан харна. Гараа буулгахдаа амьсгаагаа гаргана.

Энэ цогц дасгалыг компьютерийн ард 40-50 минут ажилласны дараа тогтмол хийж байх нь сайн. Дасгалыг хийх хугацаа 3-5 минут.

Нүдний массаж: Нүдээ аниад долоовор болон дунд хуруугаараа наймын тоо хэлбэртэй хөдөлгөөн хийж иллэг хийх нь нүдний цусны эргэлт, мэдрэлд сайн нөлөө үзүүлдэг. Ухархайн доод хэсэгт хөдөлгөөн нь хамар руу чиглэсэн, дээд хэсэгт нь хөмсөгний дээгүүр. Дасгалыг 8-16 удаа давтана.