Хан Хэнтийн улсын тусгай хамгаалалттай газрын хамгаалалтын захиргааны 2023 оны гүйцэтгэлийн төлөвлөгөөний хэрэгжилтийг хангах ажлын хүрээнд гүйцэтгэлийн төлөвлөгөөний зорилт 2.1, 2.3 дахь зорилтыг  хэрэгжүүлэн дархан цаазат газрын нутгийн гүнд эргүүл шалгалт, судалгаа мониторинг, камер тавих, хужир мараа тавих, Байгаль орчин, аялал жуулчлалын Сайдын 2023 оны 05 дугаар сарын 11-ны өдрийн А/155 тоот тушаалаар батлагдсан “Ойн дагалт баялгийг хамгаалах, зохистой ашиглах журмын хэрэгжилтийг хангах ажлын хүрээнд энэ төрлийн гэмт хэрэг, зөрчлөөс урьдчилан сэргийлэх, таслан зогсоох арга хэмжээг тус тус зохион байгуулан ажиллалаа.

Дархан цаазат газар нутгийн гүнд нэгдсэн эргүүл шалгалтын ажлыг 2023 оны 09 сарын 18-30-ны өдрүүдэд хамгаалалтын захиргааны бүх хэсгийн байгаль хамгаалагчид, мэргэжилтнүүдийг  хамруулан хийж гүйцэтгэлээ. 

Гүний морин эргүүл шалгалтыг нийт 8 бүлэг болон 8 маршрутын дагуу зохион байгуулсан. 

Уг шалгалтад нийт 20 автомашин, 175 иргэн, 8 отог хамрагдан шалгаснаас 6 морь, 12 автомашин бүхий 112 иргэнийг албадан буулгах арга хэмжээ авч, шууд буух боломжгүй байгаа /машин нь эвдэрсэн, жолооч нь байхгүй/ иргэдэд хугацаатай үүрэг даалгавар өгч, галт зэвсэг 1 ширхэг хураан авч хууль журмын дагуу арга хэмжээ авахаар ажиллаж байна.