Зам, тээврийн хөгжлийн яамнаас 2023 оныг бүрэн цахимжсан, бүтээмжийг нэмэгдүүлж, хариуцлага, үр дүнг тооцох жил болгон зарлаж, салбарынхаа үйлчилгээ бүрийг цахимжуулж, иргэдэд хүнд сурталгүй болгохоор бүхий л арга хэмжээг авч хэрэгжүүлж байна.

Тухайлбал, иргэд хамгийн их ашигладаг хот хоорондын автобусны тасалбар, төмөр замын билет, нисэх онгоцны билетийг цахимаар, хүссэн цагтаа, хүссэн газраасаа захиалга хийх боломжтой боллоо.

Хот хоорондын автобусны тасалбараа https://eticket.transdep.mn/ хаягаар, галт тэрэгний тасалбараа https://eticket.ubtz.mn/, УБТЗ Тасалбар аппликейшн, Киоск, Tapatrip, MONPAY, SOCIALPAY, 1900-1949 утас зэрэг төлбөрийн боломжит бүх сувгаар захиалах боломжтой.

МИАТ ТӨХК, Хүннү Эйр, Аэро Монголиа ХХК зэрэг нислэгийн компаниуд өөрсдийн цахим хаяг, аппликейшнүүдээр дамжуулан цахимаар захиалга хийж болох юм байна.

Мөн агаарын тээвэр, автотээвэр, төмөр замын зорчигч тээврийн тасалбарыг бүгдийг нь нэг дороос харахыг хүсвэл Зам, тээврийн хөгжлийн яамны  https://mrtd.gov.mn/ албан ёсны хаягны мэдээ, мэдээлэл хэсгийн холбоосоор нэвтрэн захиалах боломжтой.

Яамны албан ёсны хаягаас гадна Tapatrip аппликейшнаар тээврийн бүх үйлчилгээг нэг дороос авч болно. Иргэд та бүхэн тасалбараа өөрт хамгийн амар цахим шийдлийг сонгож, өөрийн алтан цагаа хэмнэж, цаас хэвлүүлэхгүй байж эх дэлхийгээ ч хайрлах боломжтой юм гэж ЗТХЯ-аас мэдээллээ.