2022-2023 онд шинээр томилогдон ажиллаж байгаа аймаг, дүүргийн  прокуроруудад зориулсан сургалт Улаанбаатар хотноо зохион байгуулагдаж байна. Тус сургалт энэ сарын 02-ны өдрөөс эхэлсэн, өнөөдрийг хүртэл үргэлжилж байна.

Шинэ залуу прокуроруудыг чадавхжуулах зорилготой сургалтын хүрээнд прокурорын хяналтын чиг үүргийг хэрэгжүүлэх явцад хүний эрх, эрх чөлөө, төр, нийтийн ашиг сонирхлыг хамгаалах, зөрчигдсөн эрхийг сэргээх, зөрчигдөхөөс урьдчилан сэргийлэх, хууль тогтоомжийн хэрэгжилтийг нэг мөр хангуулахад анхаарах зэрэг асуудлын талаар онцлон мэдээлэл өгч байна.

УЕПГ-ын дэргэдэх Сургалт, судалгааны хүрээлэнгийн хяналтын прокурор Ц.Хашбаатар:

-Прокурорын анхан шатны сургалтыг 2023 онд 3 дахь удаагаа зохион байгуулж байна. Энэ удаагийн сургалтын онцлог нь АНУ-ын Төрийн департаментын санхүүжилтээр Азийн сангаас хэрэгжүүлж буй “Залуу хуульчдыг чадавхжуулах замаар Монгол Улсын шүүх эрх мэдлийн тогтолцоог бэхжүүлэх нь” төслийн дэмжлэгтэйгээр судлаач, эрдэмтэд болон олон жил ажилласан дадлага, туршлага бүхий прокуроруудтай хамтран “Шинээр томилогдсон прокуроруудад зориулсан сургалтын гарын авлага”-ыг боловсруулсан.

Уг гарын авлагын агуулгыг бүрэн хамруулан сургалтыг зохион байгуулж, Улаанбаатар хотод томилогдсон 4, орон нутагт томилогдсон 29, нийт 33 прокурор хамрагдлаа.

Сургалтаар прокурорын ёс зүй, хараат бус байдал, хяналтын ажлын онцлог, хавтаст хэрэг хянах арга зүй, хэргийн түүвэр хийх аргачлал, хувь хүний хөгжил, стресс менежмент зэрэг сэдвийн хүрээнд мэдээ, мэдээллийг өгч байна.