Өнгөрсөн зургаадугаар сард Ерөнхий сайд Л.Оюун-Эрдэнэ БНХАУ-д албан ёсны айлчлал хийхдээ Замын-Үүд-Эрээн боомтыг 24 цагийн ажиллагаатай болгохоор талууд тохиролцож байсан.

Өнгөрсөн хугацаанд тус ажлын бэлтгэлийг хийж боомтыг ирэх арваннэгдүгээр сараас 24 цагаар ажиллуулахаар бэлтгэж байна. БНХАУ-ын талаас санхүүжилтээ шийдэж, холбогдох ажлыг хийж дуусгавал тус боомтыг ойрын хугацаанд 24 цагийн горимд шилжүүлнэ гэдгийг албаныхан хэллээ. Мөн Эрээн-Замын-Үүд боомтын автозамын хөдөлгөөнийг удахгүй нээх юм байна. Автозамын шалган нэвтрүүлэх боомтын бүтээн байгуулалтын ажил дууссан бөгөөд өнгөрсөн долоо хоногт Улсын комисс хүлээн авчээ. Ингэснээр зорчигч, ачаа тээвэр нэг шугамаар явахгүй ачаалал багасна гэж үзжээ.