Олон улсын Хэрэглэгчийн эрхийг хамгаалах сүлжээ (ICPEN)-ний ээлжит бага хурал Польшийн нийслэл Варшав хотноо энэ сарын 3-6-ны өдрүүдэд болж байна.

Энэхүү бага хуралд Шударга өрсөлдөөн, хэрэглэгчийн төлөө газрын дарга С.Ням-Эрдэнэ холбогдох газрын дарга нарын хамт цахимаар оролцлоо. Варшавт болж буй бага хуралд Олон улсын Хэрэглэгчийн эрхийг хамгаалах сүлжээ байгууллагын гишүүн 70 гаруй орны төлөөлөл танхимаар болон цахимаар оролцож байна.

Жил бүр зохион байгуулагддаг хурлаар гишүүн байгууллагууд хэрэглэгчийн эрхийг хамгаалах, хууль эрх зүйн орчныг сайжруулах, туршлага солилцохын зэрэгцээ хэрэглэгчийн эрх ашгийг хамгаалах байгууллагуудын уялдаа холбоог хөгжүүлэхэд ихээхэн ач холбогдолтой юм.

Олон улсын Хэрэглэгчийн эрхийг хамгаалах сүлжээ (ICPEN) нь дэлхийн 70 гаруй орныг нэгтгэсэн гишүүнчлэлтэй бөгөөд манай улс 2012 онд элссэн юм гэж ШӨХТГ-аас мэдээллээ.