“Цусны даралт ихсэлтийн эсрэг-2023” уламжлалт аяны нээлт энэ сарын 18-нд Дундговь аймгийн төв Мандалговьд болж гурван өдрийн турш иргэдэд цусны даралт ихсэх өвчнөөс урьдчилан сэргийлэх мэдлэг мэдээлэл олгох сургалт сурталчилгаа явуулж, иргэдийг үзлэг оношлогоонд хамруулсан байна.
Долоо дахь удаагаа болж буй уг аяныг 2017 оноос эхлэн НЭМҮТ, УГТЭ, ХААН банк сан, МҮОНРТ хамтран зохион байгуулж ирсэн бөгөөд энэ жилийнх Дундговь аймгаас эхэлж, Өвөрхангай, Завхан, Говь-Алтай аймагт үргэлжлэх юм.



Хөдөлгөөний хомсдол, жингийн илүүдэл, зохисгүй хооллолт, амьдралын буруу хэв маяг, стресс бухимдал нь монголчуудын нас баралтын тэргүүлэх шалтгааны нэг болсон зүрх судасны өвчлөлийг үүсгэдэг. Цусны даралт ихэссэнээр  тархинд цус харвах, зүрхний шигдээс болох эрсдэл өндөр юм. Цусны даралт ихсэлтээс үүдсэн нас баралтаар дэлхий Ази тив тэргүүлдэг бол Монгол Улс уг өвчнөөс шалтгаалсан нас баралтаар тивдээ тавдугаарт ордог гэсэн харамсалтай тоо бий.



Дундговь аймгийн хувьд хүн амын өвчлөлийн тэргүүлэх шалтгааны нэгд зүрх судасны тогтолцооны эмгэг ордог бөгөөд нийт нас баралтын 39.3 хувийг эзэлдэг. Аймгийн нэгдсэн эмнэлгийн амбулаторид бүртгэгдсэнээр цусны даралт ихсэх өвчлөл 10,000 хүн ам тутамд 566 байна гэсэн судалгаа гарчээ.
Тиймээс Дундговь аймагт зохион байгуулсан аяны хүрээнд цусны даралт ихсэлтийн оношлогоо, эмчилгээний шинэчлэн батлагдсан удирдамж заавар, харвалт шигдээсийн эрсдэлийн үнэлгээ хийх арга аргачлалын чиглэлээр орон нутгийн эмч мэргэжилтнүүдэд, мөн ХААН банкны орон нутгийн салбарын ажилтнуудад сайн дурын идэвхтэн бэлтгэх сургалтыг зохион байгуулж иргэдэд цусны даралт ихсэлтийн талаар зөвлөгөө мэдээллийг өгч эрүүл мэндийн боловсролыг олгох, амьдралын зөв мэдлэг хандлагатай болгоход олон нийтийг хамруулсан томоохон нөлөөллийн ажлыг зохион байгуулсан байна.



Түүнчлэн цусны даралт ихсэх  өвчний эрсдэлт хүчин зүйлсийг илрүүлэх үнэлгээг 40-өөс доош насны 100 хүнд, зүрх судасны өвчнөөр ойрын арван жилд өвчлөх эрсдэлийг тогтоох үнэлгээг 40-өөс дээш насны 490 хүнд, бие бялдрын бүрдмэл үнэлгээ буюу “Танита” аппаратаар хүний биеиин бүтцийг тодорхойлох шинжилгээг 181 хүнд хийж, “Эрүүл амьдралын хэв маяг” сургалт, зөвлөгөөг 150 хүнд өгч давхарсан тоогоор 921 хүнд эрт илрүүлэг, оношлогоо, үнэлгээ хийж эрүүл мэндийн боловсрол олгох зөвлөгөө мэдээлэл өгчээ.



Энэхүү аяныг 12 аймаг, Улаанбаатар хотод зохион байгуулж 19 мянга гаруй хүнийг үзлэг оношилгоонд хамруулж, эрүүл мэндийн долоон булан байгуулж, 600 эмч, эмнэлгийн мэргэжилтэнд сургалт зохион байгуулаад байгаа юм.