Ардчилсан Намын/АН/ дэд дарга И.Мөнхжаргал, УТЗ-ийн гишүүн Ц.Одонтунгалаг нар нийслэлийн автобусны худалдан авалттай холбоотой зарим албан тушаалтныг шалгуулахаар албан бичиг хүргүүлж байгаагаа мэдэгдэж, АТГ-ын гадаа мэдээлэл өглөө.

АН-ын дэд дарга И.Мөнхжаргал "Нийтийн тээврийн автобусаар бидний үр хүүхэд, эцэг эхчүүд, иргэд зорчдог. Автобусыг худалдаж авахдаа хуучин оныхыг хууль бусаар авсан асуудал хэрээс хэтэрлээ. Эд нар хоорондоо хариуцлага ярина гэж байхгүй. Тийм учраас хуулийн байгууллагад хандаж байна.

Иргэдийн эсрэг хийж байгаа гэмт хэрэг хэрээс хэтэрлээ. Нэгийгээ хамгаалж, хаацайлж явсаар байтал иргэд та нартай хариуцлага ярих цаг ирнэ.

Нийслэлийн Засаг дарга Д.Сумъяабазар, сайд Ж.Сүхбаатар нарыг АТГ-т шалгуулах өргөдөл өгч байна. 318 тэрбум төгрөгөөр 457 ширхэг хуучин автобус авсан гэж байгаа нь хэмжээнээс хэтэрлээ.

Бөх нь бөхөө барилдаж, Засаг даргаа хийдэг хүн нь хийг" гэв.

Ардчилсан Намын Улстөрийн Зөвлөлийн гишүүн Ц.Одонтунгалаг "Ард түмнийхээ амь насны эсрэг, аюултай нөхцөл үүсгэж 300 гаруй тэрбум төгрөгөөр автобус худалдаж авч байгаа нь Монгол Улсын иргэдийн амь насны эсрэг ноцтой гэмт хэрэг гэж үзэж байна. Ийм учраас нийтийн тээврийн асуудлыг АТГ-т өгч шалгуулж байна.

ХҮН намын мэдээллээс харахад тэдгээр автобусыг хувийн компани нийлүүлж, оруулж ирсэн байна. Худалдан авалтыг нууцын зэрэглэлд оруулж байгаад хувийн компани оруулж ирсэн нь ашиг сонирхлын зөрчил гэж үзэж байгаа. 

Олон улсын стандарт, хүний аюулгүй байдал, нийгмийн захиалгат үйлчилгээ гэдгийг мэдсээр байж нийлүүлэгч “Тэнүүн-Огоо” компани 30 жилийн насжилттай ийм автобус оруулж ирж байгаа нь ноцтой, аюултай гэмт хэрэг.

Нийтийн тээвэрт мотор нь тусдаа байх стандарт байдаггүй. Гэтэл Түгжрэлийн сайд ингэж тайлбарлаж байна. Моторыг нь тусдаа авчраад автобусыг нь тусдаа авчирдаг стандарт байхгүй.

Автобусны стандарт үйлдвэрлэсэн он сараасаа хойш 12 жилийн хугацаатай байдаг. Харин Солонгост зургаан жилийн хугацаатай. Мэргэжлийн хэллэгээр хугацаа нь дуусвал металл нь ядардаг, ялзардаг. Төмөр нь язардаг учраас нийтийн тээвэрт хүн тээж явахад аюултай гэж үздэг.

Нийтийн тээврийг бизнес болгож, мафийн системд оруулсан хүн бол “Тэнүүн-Огоо” компанийн захирал А.Ганхуяг. Энэ хүн салбарынхаа эрх ашгийг зөрчиж, хуучин автобус авчирч буй нь гэмт хэргийн шинжтэй байна. Тиймээс АТГ-аар шалгуулах өргөдлөө өгч байна" хэмээн хэллээ.