АНУ-ын Бүгд найрамдах намаас 2024 оны Ерөнхийлөгчийн сонгуульд нэр дэвшихээр өрсөлдөгчид хоёр дахь мэтгэлцээнээ хийсэн байна.

Бүгд найрамдах нам дотроо тэргүүлэгчийн байр сууриа хадгалсан хэвээр байгаа Дональд Трампыг чамгүй дайрч давшилсан, бас цагаачдын асуудал болон бусад сэдвээр хурц маргасан энэ мэтгэлцээнийг үзэгч ажиглагчид нэлээд замбараа муутай болсон гэж дүгнэж буй юм байна.

Калифорни дахь Рональд Рейганы нэрэмжит номын санд болсон энэ мэтгэлцээн Дональд Трампын өрсөлдөгчдийн хувьд ирэх оны нэгдүгээр сард Айова мужаас нам доторх сунгаа албан ёсоор эхлэхээс өмнө хэн нь жинхэнэ ул суурьтай нэр дэвшигч болж чадахаа харуулах нэг боломж гэж тооцогдож байсан.

Тиймдээ ч тэд бие биенээ давах гэхээсээ гадна Дональд Трампын сул талуудад дөрөөлж буруутгахыг хичээж байсныг хэвлэлүүд дурдаж байна.

Дональд Трамптай өрсөлдөгч долоон нэр дэвшигч нь Флоридагийн амбан захирагч Рон Десантис, Дэд Ерөнхийлөгч асан Майк Пенс, бизнес эрхлэгч Вивек Рамасвами, Өмнөд Каролинагийн сенатч Тим Скотт, АНУ-аас НҮБ-д суух суурин төлөөлөгч асан Ник Хейли, Нью-Жерсигийн захирагч асан Крис Кристи, Умард Дакотагийн захирагч Дуг Бургум нар юм.

Эдүгээ 77 настай Дональд Трамп харин өмнөх сарын адилаар хоёр дахь мэтгэлцээнд бас ороогүй байна. Санал асуулгаар Бүгд найрамдах намын сонгогчдын 56 хувь нь өөрийг нь дэмжиж байгаа учир Дональд Трамп стратегийн хувьд мэтгэлцээнд оролцоод ямар ч үр ашиггүй гэж үзсэн байх талтай байна. Оронд нь тэрбээр Мичиган руу автомашин үйлдвэрлэгч компаниудын ажил хаялтад оролцогчидтой нэгдэхийг илүүд үзжээ.

Түүнийг очихын урд өдөр Ерөнхийлөгч Жо Байден мөн ажил хаялтад оролцогчдод дэмжлэгээ илэрхийлж очсон. Жо Байден ч бас ирэх жилийн сонгуульд дахин нэр дэвшихээ мэдэгдээд байгаа. Харин нам дотроо Дональд Трампын хамгийн ойр өрсөлдөгч боловч чамгүй хойно яваа Флоридагийн амбан захирагч Рон Десантис харин “Трампыг тулаанаас сураггүй алга боллоо” гэж мэдэгдэж байжээ.

Энэ удаагийн мэтгэлцээнээр хил хязгаар, цагаачдын асуудлаас эхлээд Украины дайны сэдвээр маргасан. Гэхдээ гадаад бодлого бараг л яригдаагүйг ажиглагчид хэлж байна.

Мэтгэлцээнд оролцогчдоос Десантис, Нью-Жерсигийн амбан захирагч асан Крис Кристи хоёр л санал асуулгаар 10-аас дээш хувьтай гарчээ.