JCI Монгол байгууллагын залуус Төв аймгийн Нэгдсэн эмнэлэгт 105.8 сая төгрөгийн үнэ бүхий 20 гаруй нэр төрлийн тоног төхөөрөмжийг хүлээлгэн өглөө.

Тус байгууллагын санаачлан хэрэгжүүлдэг "Save Angels" төсөлд БНСУ-ын “JCI Korea” үндэсний байгууллага хандивлагчаар оролцож, тоног төхөөрөмжийн багцад орсон хоёр ширхэг инкубаторыг өгсөн юм.

Төслийн нээлтэд JCI Монгол байгууллагын 2023 оны үндэсний Ерөнхийлөгч C.Мөнхдэлгэр, JCI Korea байгууллагын Дэд ерөнхийлөгч, Гадаад төсөл хариуцсан захирал Lee Dae il, JCI Чэйрмэн салбар байгууллагын гишүүд, Аймгийн Нэгдсэн эмнэлгийн эмч ажилтнууд оролцлоо.

“Save angels” төсөл энэ оны эхний хагас жилд Сүхбаатар аймагт хэрэгжиж, орон нутгийн Нэгдсэн эмнэлэгт 66.5 сая төгрөгийн үнэ бүхий 18 нэр төрлийн 20 гаруй тоног төхөөрөмжийг хандивлаад байгаа юм.

Нийтдээ найман жилийн хугацаанд Улаанбаатар хотод ЭХЭМҮТ, "Амгалан", "Өргөө" амаржих газар, орон нутагт Архангай, Завхан, Говь-Алтай, Хөвсгөл, Орхон, Өмнөговь аймийн Нэгдсэн эмнэлэгт дутуу төрсөн нярайд нэн шаардлагатай 1.5 тэрбум төгрөгийн үнэ бүхий тоног төхөөрөмжийг хандивлажээ.

Үүний үр дүнд эх дэлхийдээ яаран ирсэн 2200 гаруй нярайн амь насыг аварсан гэж төслийг санаачлагчид хэлж байлаа.

Мөн Монгол Улсын нярайн эндэгдлийг 30 орчим хувиар бууруулж, хүн амзүй, эрүүл мэндийн салбарт хувь нэмэр оруулсан болохыг судалгаанд дурджээ.