БНАСАУ Ковид-19 цар тахал үндсэндээ намжиж байна гэж үзэж хилийн хатуу хориг хязгаарлалтаа сулруулж, өнгөрсөн 8-р сарын сүүлчээр гадны улс оронд оршин суугаа иргэддээ хилээ нээж байгаагаа мэдэгдсэн. Харин, энэ долоо хоногийн Даваа гарагаас эхлэн, хилийн хязгаарлалтаа дахин нэг шат сулруулж, гадны улс орны иргэд, жуулчдад хилээ нээсэн тухай Хятадын төв телевиз мэдээлснийг өнөөдөр олон улсын хэвлэлүүд иш татан мэдээлж байна.

Умард Солонгос улс Ковид-19 цар тахлын дараа хилийн хоригоо сулруулсан дэлхийн хамгийн сүүлийн улс болж байна. Хятадын төв телевизийн мэдээлж байгаагаар, Умард Солонгосын хилээр нэвтэрч буй хүмүүст 2 хоног тусгаарлагдах шаардлагыг тавьж байгаа юм байна. 2020 оны эхээр Умард Солонгос улс цар тахлаас урьдчилан сэргийлэхийн тулд хилээ хааж, хүнс эм тариа зэрэг чухал барааны импортоо бүрмөсөн зогсоосон. Энэ нь тус улсын аялал жуулчлал, худалдаа, тээвэр зэрэг эдийн засгийн ач холбогдолтой бүхий л салбарт сөрөг нөлөө үзүүлсээр иржээ. Өмнөд Солонгосын тагнуулын агентлаг, Умардын талыг эдийн засгаа сэргээхийн тулд хилдээ тогтоосон хатуу хориг хязгаарлалтаа аажмаар сулруулж байна гэж үзэж байгаагаа илэрхийлсэн байна.

Зарим судалгаанаас харахад тус улсын эдийн засгийн өсөлт сүүлийн 3 жилийн хугацаанд уналттай гарчээ. Зөвхөн 2022 оны байдлаар л гэхэд дотоодын нийт бүтээгдэхүүн 2016 онтой харьцуулахад 12 хувиар буурчээ. Пхеньян өнгөрсөн 8-р сард хилийн хязгаарлалтыг үе шаттайгаар сулруулж, Умард Солонгосын төрийн мэдлийн агаарын тээврийн Эйр Корео компани Пхеньян-Бээжин чиглэлд нислэг үйлдэж, Азийн наадамд 200 орчим тамирчны бүрэлдэхүүнтэй багаа илгээсэн байна. Үүний зэрэгцээ өнгөрсөн Пүрэв гарагт хятадын төлөөлөгч Умард Солонгосын аялал жуулчлалын салбарын албаныхантай уулзалт хийх үедээ Хятад Умардын хоорондох аялал жуулчлал тун удахгүй хэвийн болно гэдэгт найдаж байгаагаа илэрхийлсэн байна.

Энэ сарын дунд үед Умардын удирдагч сүүлийн 4 жилд анх удаа холбоотон ОХУ-д албан ёсны айлчлал хийж алс дорнодын бүс нутагт ерөнхийлөгч Путинтэй дээд хэмжээний уулзалт хэлэлцээ хийсэн. Умард Солонгос улс ойрын түнш Хятад Орос улстай аялал жуулчлалын салбарыг хөгжүүлэх замаар эдийн засгаа сэргээх зорилготой байна гэж шинжээчид харж дүгнэж байна. Үүний зэрэгцээ тус улс өнгөрсөн сард аялал жуулчлалын салбараа сэргээх хүчин чармайлтын хүрээнд шинэ хууль баталсан. Энэ нь дотоодын болон олон улсын аялал жуулчлалыг өргөжүүлэх, жуулчдын аятай тухтай аялах нөхцөлийг бүрдүүлэхэд чиглэсэн байна.