Дэлхийн тээврийн сайд нарын гурав дахь удаагийн чуулга уулзалт БНХАУ-д зохион байгуулагдаж байна. Энэ үеэр Зам тээврийн хөгжлийн сайд С.Бямбацогт Хятадын Тээврийн сайд Ли Шяопинтэй уулзаж Монгол Улс, БНХАУ-ын Засгийн газар хоорондын Автотээврийн харилцааны тухай хэлэлцээрийг хэрэгжүүлэх протоколд гарын үсэг зурлаа.

Ингэснээр захиалгат тээвэр, аялал жуулчлалын зорилгоор зорчих зорчигч тээвэрлэлтийг наймаас дээш хүний суудалтай тээврийн хэрэгслээр БНХАУ-ын Бээжин, Тяньжин, Хөх хот болон бусад хотууд руу хийх боломж нээгдэх мөн монгол тээвэрчид БНХАУ-ын нутгаар дамжин Казакстан, Киргиз улсуудаар нэвтэрч Европын орнууд руу тээвэр хийх боломж бүрдэж байгаа юм.

Үүнээс гадна далайн боомтоос эсхүл далайн боомт руу Хятад улсын нутгаар дамжин чингэлэг тээвэр хийх нөхцөл бүрдэж байна.

Дээрх боломжууд нээгдсэнээр эдийн засаг тэлэх, аялал жуулчлал хөгжих, тээврийн салбарт өрсөлдөөн бий болж тээврийн үнэ ханш буурах, импортын бараа бүтээгдэхүүний үнэ хямдрах гэх мэт олон ач холбогдолтойг онцоллоо.