Эрүүл мэндийн сайд 2023 онд тусгайлан үүрэг болгосон арга хэмжээг хэрэгжүүлэх үйл ажиллагааны хүрээнд хүүхдийн тархины саагийн шалтгаант булчин чангарлын үеийн нугасны мэдрэлийн арын ёзоорыг сонгомлоор таслах ризотоми мэс заслын эмчилгээг өөрийн эх оронд бүрэн нутагшуулах зорилгоор Япон улсын Токио хотын Хүүхдийн эрүүл мэндийн төвтэй хамтын ажиллагааг эхлүүлсэн. Энэ ажлын хүрээнд Японы Токио хотын Хүүхдийн эрүүл мэндийн төвийн хүүхдийн тархи, нугасны мэс засал, мэдрэлийн дурангийн болон функциональ мэс засал, мэс заслын үеийн мэдрэлийн физиологийн шинжилгээгээр мэргэшсэн хүүхдийн мэдрэлийн мэс заслын зочин профессорын баг Улсын гуравдугаар төв эмнэлэгт энэ сарын 18-23-нд ажиллалаа.

Хамтын ажиллагааны хүрээнд ирсэн эмч нарын баг мэс засал эмчилгээний тактик сонгох үүднээс тархины саа, саажилт, хөдөлгөөний эмгэгтэй нийт 50 хүүхдэд хамтарсан багаар нарийвчилсан үзлэг оношилгоо хийн, зөвлөгөө өгч, үүнээс яаралтай мэс засал эмчилгээ шаардлагатай зургаан хүүхдэд булчингийн чангарлыг тавиулж, хөдөлгөөний алдагдлыг засах нурууны мэдрэлийн арын ёзоор таслах ризотоми мэс засал эмчилгээг үнэ төлбөргүй хийлээ.

Мэс засал эмчилгээнд орсон хүүхдүүдийн биеийн байдал тогтвортой сайжирч, тусламж үйлчилгээний тасралтгүй байдлыг хангах, эрчимтэй сэргээн засах эмчилгээний зорилгоор мэс заслын дараах долоо дахь хоногоос Эх хүүхдийн эрүүл мэндийн үндэсний төвийн хүүхдийн сэргээн засах эмчилгээнд шилжиж, үргэлжлүүлэн холбогдох эмч нарын хяналтад эмчлүүлж байна.