МУ-ын ерөнхийлөгч У.Хүрэлсүхийн санаачилгаар “Мазаалай баавгай хамгаалах үндэсний зөвлөгөөн"-ийг Төрийн ордонд зохион байгуулсны дагуу Мазаалай баавгайг үндэсний бахархалт амьтан боллоо. Энэ ажлын хүрээнд жил бүрийн хоёрдугаар сарын 28-ны өдрийг Мазаалай баавгайн өдөр болгох, Мазаалай нутагладаг говийн Их дархан цаазат газар "А" хэсэгт байрлах баянбүрдүүд, уст цэгүүдийг сэргээж хамгаалах, энэ оны аравдугаар сард хоёр Мазаалайг сансрын дохиололтой хүзүүвчээр хүзүүвчлэх, Мазаалайн нэрийг барьж үйл ажиллагаа явуулдаг 48 Төрийн бус байгууллагуудын үйл ажиллагаанд хяналт тавьж, цогц ажилтай уялдуулах, Мазаалай хамгаалах нэгдсэн сан байгуулж шилэн данстай болгох зэрэг олон чухал асуудлуудыг хэлэлцэн шийдвэрлэсэн байна. Дэлхийд зөвхөн Монголын говьд амьдардаг Мазаалай баавгайг хамгаалснаар говийн экосистем сайжирч, ховор амьтад давхар хамгаалагдах юм.

Мазаалай баавгайг анх 1953 онд агнахыг хориглож, 1995 онд нэн ховор амьтны жагсаалтад оруулж байжээ. Энэ оны гуравдугаар сарын байдлаар мазаалайн тоо толгой 36-50 болж өсөж үржсэн байна.Тэдний гол байршил нутаг дээр 150 ширхэг автомат камерыг байршуулж сүүлийн гурван жил тасралтгүй судалгааны ажлуудыг хийсээр иржээ.