Төрийн аудитын байгууллагаас Эрүүл мэндийн яамны 2022 оны санхүүгийн тайлан, төсвийн гүйцэтгэлд  аудит хийхэд хэд хэдэн зөрчил илрүүлсэн байна. Үүнд:

Эрүүл мэндийн сайдын тушаалаар салбарын болон бусад байгуулллагад 7,678,646,560 төгрөгийн хөрөнгө, эм, эмнэлгийн хэрэгслийг үнэ төлбөргүй шилжүүлсэн бөгөөд тооцоо нийлж, актаар баталгаажуулаагүй. Энэ нь Төсвийн тухай хууль болон нягтлан бодох бүртгэлийн хуулийг зөрчсөн.

"Эм Импекс Концерн ХХК"-ийн агуулахад хамтран ажиллах гэрээний хүрээнд хадгалж байгаа эм, эмнэлгийн хэрэгслийн нэг хоногийн төлбөрийг тусгаагүй байхад 212 хоног хадгалуулсан. Үүний хөлсөнд 109,040,000 төгрөг төлснийг Аудитын байгууллага  зөрчил гэж үзсэн бөгөөд Төсвийн тухай хуулийг биелүүлээгүй гэж дүгнэсэн.

ТӨБЗГ-ын зөвшөөрөлгүйгээр 24,780,000 төгрөгийн Verna Accent автомашиныг  Хэнтий аймгийн Батширээт сумын нэгдсэн эмнэлэгт шилжүүлэн олгосон. Мөн 99,000,000 төгрөгийн Nissan Altima, 32,527,000 төгрөгийн Nissan Patrol маркийн автомашинуудыг Шүүхийн сахилгын хороо болон Эм, эмнэлгийн хэрэгслийн хяналт зохицуулалтын газарт балансаас балансад шилжүүлсэн байна.

Глобал сангийн зөвшөөрөлгүйгээр 71,448,834 төгрөгийн зөөврийн дижитал рентген аппаратыг  Эрүүл мэндийн яам худалдаж авжээ. Глобал сангаас эргүүлэн төлөх зөвлөмж хүргүүлсэн ч хэрэгжүүлээгүй. Үүнийг аудитын байгууллага Төсвийн тухай хуулийг хэрэгжүүлж ажиллах, 71,448,834 төгрөгийг Глобал санд эргүүлэн төлөх албан шаардлага өгсөн байна.

Эм, эмнэлгийн хэрэгслийг хүлээн авах, хадгалах, түгээх хамтран ажиллах гэрээтэй Монгол Эм Импекс ХХК-тай 25 тэрбум төгрөгийн орлого, 60 тэрбум төгрөгийн зарлагын гүйлгээг тооцоо нийлж баталгаажуулаагүй байна.

БНХАУ-ын тусламжаар ирсэн 785,180,000 төгрөгийн амны хаалт, хамгаалах хувцас, хэрэгслийг бараа материалын дансанд орлогоор бүртгээгүй.

"Мөнхийн тун" ХХК-д 124,850 сая төгрөг, "Халдваргүйжүүлэлт" ХХК-д 20,592,000 төгрөгийн бараа материалын төлбөр төлсөн боловч бараа материалаа биетээр хүлээн аваагүй байна.