Умард Солонгос баллистик пуужингийн технологи ашигласан хөөргөлт хийснийг Японы Засгийн газраас мэдээллээ. Пуужин японы өмнө зүгийн Окинава мужийн дээгүүр гарчээ. Умард Солонгосын мэдээний төв агентлаг харин, пуужингийн гурав дахь шатлалд алдаа гарч сүйрсэн тухай мэдээлсэн байна.

Умард Солонгосын баруун хойд зүгт байрлах пуужингийн цогцолбороос Японы цагаар шөнийн 03 цаг 51 минутад пуужин харвасан гэж японы тал мэдээлж байна. Мөн Японы Өөрийгөө хамгаалах хүчин пуужинг амдан сөнөөх оролдлого хийгээгүйг энд дурджээ. Японы Засгийн газар нөхцөл байдлыг үнэлэхээр Үндэсний аюулгүй байдлын зөвлөлийн хуралдаан зарласан байна. Засгийн газрын танхимын Ерөнхий нарийн бичгийн дарга Мацуно Хироказу “Энэ бол аливаа пуужингийн туршилтыг хориглосон НҮБ-ын Аюулгүйн зөвлөлийн тогтоолыг зөрчиж, японы ард иргэдийн аюулгүй байдалд аюул заналхийлсэн үйлдэл юм. Энэ мэт үйлдлээ зогсоохыг олонтоо уриалсныг үл хайхран Умард Солонгос улс пуужин харвалаа. Энэ нь усан болон агаарын тээврийн аюулгүй байдлаар зогсохгүй, хүн ардад аюул заналхийлж байгаа туйлын онц ноцтой үйлдэл юм” гэж мэдэгджээ.

Харин Умард Солонгос цэргийн тагнуулын хиймэл дагуул хөөргөх гурав дахь оролдлогоо ирэх 10-р сард хийнэ гэж мэдээний төв агентлаг нь уламжилсан байна. БНАСАУ-ын мөн саяны туршилт амжилтгүй болсон шалтгааныг хөдөлгүүр болон бусад системийн аюулгүй ажиллагааны үүднээс онц их асуудалтай биш, шалтгааныг сайтар нягталж, зохих арга хэмжээг авсны үндсэн дээр дараагийн хөөргөлтийг явуулна” гэж энэ мэдээнд өгүүлсэн байна. Японы Батлан хамгаалах яамны мэдээгээр, умардын пуужингийн хэсгүүд Шар тэнгис, Өмнөд Хятадын тэнгис болон Номхон далайд унажээ. Мөн хохирол сүйдэл учирсан мэдээ ирээгүй байна.