Монгол Улсын Ерөнхийлөгч У.Хүрэлсүхийг Бүгд Найрамдах Казахстан Улсын Ерөнхийлөгч Касым-Жомарт Токаев Астана хот дахь Акорда ордонд угтан авлаа.

Акорда ордонд хүндэт харуул жагсан, хоёр улсын төрийн дуулал эгшиглэн ёслолын ажиллагаа болов. Үүний дараа Ерөнхийлөгч У.Хүрэлсүх, Ерөнхийлөгч Касым-Жомарт Токаев нар төрийн далбааны өмнө хүндэтгэл үзүүлж, албан ёсны уулзалтын хэсгийг эхлүүлсэн байна.

Айлчлалын хүрээнд хоёр улсын төрийн тэргүүнүүд ганцаарчилсан уулзалт хийж, дараа нь өргөтгөсөн бүрэлдэхүүнтэй хэлэлцээ үргэлжиллээ. Хэлэлцээний үеэр Монгол, Казахстаны харилцаа, хамтын ажиллагааг өргөжүүлэх, ялангуяа худалдаа, эдийн засаг, хөрөнгө оруулалтын чиглэлд хамтын ажиллагааг идэвхжүүлэх асуудлыг хэлэлцсэн байна.

Мөн айлчлалын хүрээнд талууд хамтын ажиллагааны баримт бичгүүдэд гарын үсэг зурж, албан ёсоор солилцов. Ерөнхийлөгч У.Хүрэлсүхийн энэхүү төрийн айлчлал нь Монгол, Казахстан хоёр улсын харилцааг шинэ шатанд гаргах, хамтын ажиллагааг бодит агуулгаар баяжуулахад чиглэж байгаа юм.