Өнгөрөгч Ням гарагт Япон улсын ерөнхий сайд Фүмио Кишида цунамид өртсөн Фүкүшимагийн атомын цахилгаан станцад очиж, одоогийн нөхцөл байдалтай танилцсан байна.

Тэрбээр атомын цахилгаан станцын цацраг идэвхээр бохирсдон усыг Номхон далайд цутгах ажлыг хойшлуулах аргагүй гэсэн байр суурийг илэрхийлсэн байна. Фүкүшимагийн цацраг идэвхт усыг Номхон далайд цутгах асуудал дээр Ази-Номхон далайн бүс нутгийн орнууд эсэргүүцсэн байр суурьтай байж ирсэн.

Харин Япон улс энэ асуудал дээр Олон улсын цөмийн эрчим хүчний агентлагийн дэмжлэгийг авч чадсан байдаг. Олон улсын цөмийн эрчим хүчний агентлагийн долоодугаар сарын тайланд Фүкүшимагийн атомын цахилгаан станцын Номхон далайд цутгах усанд агуулагдах цацраг идэвхт бодисын хэмжээг тооцоолон гаргаж өгсөн юм.

Хэрвээ заасан хэмжээнд хаягдал усны цацраг идэвхийн хэмжээг заасан хэмжээнд барьж чадвал тухайн усны хүрээлэн буй орчин болон хүн амд үзүүлэх нөлөө маш бага байна гэдгийг тайлбарлаж байсан юм. Тэгвэл ерөнхий сайд Фүмио Кишида Фүкүшима станц дахь энэ удаагийн айлчлалынхаа үеэр  хаягдал усыг дахиж хойшлуулалгүй асгах нь зүйтэй гэсэн байр суурийг илэрхийллээ. Мөн хаягдал усыг шүүж байгаа үйл явцтай танилцсан байна.

Хэдийгээр хаягдал уснаас үүсэх хор хөнөөлийг бага гэж үзэж байгаа ч болзошгүй эрсдэлийг тооцож, далай тэнгист загасчлалын аж ахуй эрхэлдэг хүмүүст тусламж дэмжлэг үзүүлнэ гэж мэдэгдсэн байна. Ерөнхий сайд Фүмио Кишида АНУ, БНСУ-ын ерөнхийлөгчидтэй Кэмп Дэвидэд хийсэн уулзалтаасаа буцаж ирээд хэдэн цагийн дараа Фүкүшимад очсон байна.

Кэмп Дэвид дэх уулзалтынхаа үеэр Фүмио Кишида бүс нутагт маргаан дагуулсан Фүкүшимагийн хаягдал усны асуудлыг шийдвэрлэх цаг нь болсон гэсэн мэдэгдэл хийсэн. Фүкүшимад очоод хэвлэлийнхэнд өгсөн мэдэгдэлдээ хаягдал усыг далайд болгоомжтой цутгахад анхаарал хандуулан ажиллана гэж дурдсан юм. Мөн нутгийн загасчлалын аж ахуй эрхэлдэг хүмүүсийн итгэлийг олохоор ажиллаж байгаагаас гадна БНСУ-ын зүгээс эргэн сэргэж байгаа харилцаагаа хадгалахын тулд энэ асуудал дээр хүлээцтэй хандахыг хүсэж, төлөвлөгөөгөө нарийвчлан танилцуулахаар ажиллаж байгаа юм байна.