Гавьяат тамирчин Д.Оюунболд агсны нэрэмжит чөлөөт бөхийн Насанд хүрэгчдийн УАШТ-ий эхний өдрийн медальтнууд өчигдөр тодорлоо.

Гавьяат тамирчин Д.Оюунболд агсны нэрэмжит чөлөөт бөхийн Насанд хүрэгчдийн УАШТ-ий эхний медальтнууд тодорлоо. Эмэгтэйчүүдийн 53 кг-ын жинд "Алдар" спорт хорооны бөх, 23 хүртэлх насныхны ДАШТ-ий хүрэл, Азийн АШТ-ий мөнгө, хүрэл медальтай Ч.Отгонтуяа, "Дархан Хасу FOHOW" клубийн харьяат, Азийн АШТ-ий үзүүр бөх Ц.Намуунцэцэг нар аваргын төлөө барилдсан.

Эдгээр бөхчүүд хэсгийн шатнаа учраа таарахад Ч.Отгонтуяа 9:8 харьцаатайгаар ялсан юм. Ч.Отгонтуяа финалд хий зайгүй нягт барилдсанаар өрсөлдөгчөө цэвэр давж түрүүллээ. Хүрэл медалийг 20 хүртэлх насныхны ДАШТ-ий үзүүр бөх Бямбасүрэнгийн Халиун гардав. Тэрбээр медалийн төлөөх барилдаанд “Дархан Хасу Fohow” клубийн бөх Г.Цовоог хүч, техникийн илт давуугаар буулгаж авсан.

Насанд хүрэгчдийн УАШТ-ий эхний өдрийн гол анхаарал “Алдар”-ын хоёр гавьяатын барилдаанд төвлөрч байлаа. Өнгөрсөн жил тэд Буянт-Ухааг шуугилж, эцсийн хоромд шийдэгдсэн барилдааны ялагчаар П.Орхон тодорсон. Тэгвэл энэ жил С.Цэрэнчимэд гавьяатын тонгорох мэх дархан байлаа.

Хоёр гавьяатын барилдаан ганцхан онооны зөрүүтэй шийдэгдэж, С.Цэрэнчимэд УАШТ-д долоо дахь түрүүгээ дархлав. Энэ наадмын үзүүр бөхөөр дэлхийн аварга П.Орхон тодорсон бол “Баянгол Аваргууд” академийн тамирчин Эрдэнэбилэгийн Саруул өрсөлдөгч бөхөө 30 секундэд буулгаж авснаар хүрэл медаль зүүлээ.

ДАШТ-ий мөнгөн медальт, ОУХМ Э.Даваанасан эмэгтэйчүүдийн 76 кг-д итгэл төгс түрүүллээ. Тэрбээр бүх барилдаандаа цэвэр ялахдаа нэг ч оноо алдаагүй юм. Энэ нь түүний УАШТ-ий дөрөв дэх түрүү болжээ. Хилийн цэргийн 0303-р ангийн тамирчин Г.Уртнасан мөнгөн медаль хүртсэн. Ингэснээр тэрбээр УАШТ-ий хоёр мөнгө, хоёр хүрэл медальтай болж байна.  Залуу тамирчин О.Цэлмүүн насанд хүрэгчдийн УАШТ-ий анхны медалиа авлаа.