Украины өмнө зүгийн Херсон муж дахь Каховкагийн УЦС-ийн далан нурсан асуудлаар Олон улсын эрүүгийн шүүх мөрдөн шалгалт явуулахаар болсон гэж Украины Ерөнхийлөгч Володимир Зеленский мэдэгдсэн байна. Энэ далан нурж сүйдсэний улмаас асар өргөн газар нутгийг хамарсан үерийн гамшиг тохиолдож, 6 хүн амь эрсдэн, 35 хүн сураггүй болсон тухай Украины Дотоод хэргийн яам мэдээлж байна. Орос, Украины талууд даланг сэтэлсэн хэрэгт бие биеэ буруутгаж байгаа юм.

Каховкагийн УЦС-ийн далан энэ сарын 6-ны өдөр сэтэрч гамшиг тохиолдсон даруй Украины Ерөнхий прокурорын газар энэ асуудлаар ОУЭШ-д мөрдлөг явуулах хүсэлт илгээсний мөрөөр ажил хэдийн эхэлсэн талаар Зеленский ням гарагийн оройны видео мэдэгдэлдээ ярьсан байна. Бас Украины хууль сахиулах байгууллагууд энэ мөрдөн шалгалтад бүх талаар хамтран ажиллахыг нотолжээ. Зеленский тэрчлэн, ОУЭШ-ийн төлөөлөгчид Херсон мужид очиж байдалтай танилцсаныг мэдээлсэн байна. Далан ямар хүчин нөхцөлийн улмаас сэтэрсэн, дайны гэмт хэргийн зүйлчлэлд авч үзэх үндэслэлтэй эсэхийг нягтална гэж тооцож байна. “Олон улсын шүүхийнхэн сүйрлийн цар хүрээг, бас үерт автсан нутгуудад аврагчид болон иргэд рүү буудсан тохиолдлуудыг бодитоор харах нь чухал байсан” гэж Зеленский ярьжээ. Ням гарагт Оросын цэргийнхэн нүүлгэн шилжүүлэгдэж байгаа хүмүүстэй завь руу буудсаны улмаас 3 хүн амь үрэгдсэн тухай Украины эрх баригчид мэдээлж байна.

Мөн Украины аврагчид гамшгийн бүсээс, түүний дотор Оросын хяналт дахь Днепр мөрний зүүн эргийн нутгуудаас 4000 шахам хүнийг нүүлгэн шилжүүлжээ. Харин Оросын эрх баригчид энэ бүс нутгаас 7000 гаруй хүнийг нүүлгэн шилжүүлсэн талаар мэдээлж байна. Каховкагийн далан сүйдсэний улмаас Хар тэнгис хүртэлх өргөн уудам нутагт ундны ус, хүнсний нөөц, байгаль экологид хэдэн үе дамжсан гамшиг сөрөг үр нөлөө учрах нь тодорхой болж байгааг шинжээчид тэмдэглэж байна. Өнгөрсөн хэдэн өдрийн дотор л гэхэд ямар их хэмжээний сүйдэл учирсан нь сансраас харагдаж байгаа юм байна. Оросын ерөнхийлөгчийн хэвлэлийн төлөөлөгч Дмитрий Песков Каховкагийн УЦС-ын далан нурсан тухайд, “Крымийг усгүй болгох туйлын зорилготой хорлон сүйтгэх ажиллагаа” гэдэг тайлбарыг өмнө нь өгчээ. Үүний зэрэгцээ ОУЭШ-ийн зүгээс өнгөрөгч 3-р сард Оросын Ерөнхийлөгч Владимир Путиныг баривчлах зөвшөөрөл олгосон. Харин ОХУ-ын тухайд ОУЭШ-ийн бүрэн эрхийг хүлээн зөвшөөрдөггүй. Оросын ГХЯ-ны албан ёсны төлөөлөгч Мария Захарова ОУЭШ-ийн дээрх шийдвэр Орос улсад тэр тусмаа эрх зүйн талаасаа ямар ч үр нөлөөгүй гэж мэдэгдэж байжээ.