АНУ-ын эрдэмтэд олон жилийн турш амьтны эрхтнийг хүнд хэрхэн үр дүнтэй шилжүүлэн суулгах талаар судалгаа, туршилтуудыг хийсээр ирсэн. Тэгвэл саяхан нэгэн амжилттай туршилт болсныг Лхагва гарагт хэвлэл мэдээллийн хэрэгслээр танилцууллаа. Нью-Йоркийн Их сургуулийн Лангонн эрүүл мэндийг төвийн эмч, судлаачид сарын өмнө гахайны бөөрийг тархи нь үхэжсэн өвчтөнд шилжүүлэн суулгасан нь одоо ч хэвийн үйл ажиллагаатай байгааг мэдээлсэн юм. Уг туршилт АНУ-ын эрүүл мэндийн салбарт томоохон ахиц дэвшил авчирч байгаа юм. Цаашид гахайны бөөр эрүүл, хэвийн ажиллагаагаа хадгалсаар байвал тархи нь үхжээгүй хүнд ч шилжүүлэн суулгах боломж ойртоно гэсэн тайлбарыг Нью-Йоркийн их сургуулийн эмч мэргэжилтнүүд өгч байна.

Эмч, судлаач нар тухайн бөөрний үйл ажиллагаа болон өвчтөний биеийн байдлыг анхааралтай ажиглаж байгаа юм. Цаашид дахин нэг сарын турш хэвийн ажиллах эсэхийг харна гэж мэдээллээ. Нью-Йоркийн их сургуулийн эрүүл мэндийн төвийнхний хэлж байгаагаар бөөрийг өвчтөнд шилжүүлэн суулгасны дараа удалгүй өвчтөний эрхтэн тогтолцоонд дасаж, шингэн ялгаруулж эхэлсэн гэдгийг мэдэгдэж байна. Олон жилийн турш эрдэмтэд өөр олон амьтны эрхтнийг хүнд шилжүүлэн суулгах туршилт, судалгаануудыг хийсээр ирсэн ч амжилтгүй болсон байдаг. Учир нь хүний биеийн дархлааны систем гадны ялгаатай организмыг шууд танин, тэр дороо зайлуулахыг оролддогоос голдуу бүтэлгүйдэг юм байна. Харин сүүлийн үеийн судалгаагаар гахайны ДНХ хүнийхтэй ойролцоо болох нь нотлогдсон. Мөн генетикийн аргаар донор гахайн организмыг хүний дархлааны системд амархан танигдахгүй байхаар өөрчилж өгсөн байна. Өнгөрсөн жил Мэриландын их сургуулийн эмч нар найдваргүй болсон нэгэн өвчтөнд генетикийг нь өөрчилсөн гахайн зүрх шилжүүлэн суулгажээ. Зүрх нь хоёр сарын турш хэвийн ажилласан ч тодорхойгүй шалтгааны улмаас зогссон юм. Тэгвэл энэ удаагийнх хоёр сараас давах эсэх нь анхаарлын төвд байна.

Одоогоор АНУ-д 100 мянга гаруй өвчтөн эрхтэн шилжүүлэн суулгах эмчилгээний жагсаалтад бүртгүүлсэн байдаг. Гэхдээ эрхтний донор дутмаг байдгаас жил бүр хэдэн мянган хүн амь насаа алддаг гэсэн тооцоо байдаг.