УИХ-ын гишүүн, Засгийн газрын гишүүн, Эрүүл мэндийн сайд Т.Мөнхсайханы санаачилгаар “Эрүүл мэндийн салбарын 7 хоног” арга хэмжээний хүрээнд “Нийгмийн эрүүл мэндийн бодлого тэргүүлэх чиглэл болох нь” уриан дор салбарын удирдах ажилтны зөвлөгөөн өнөөдөр амжилттай зохион байгуулагдлаа.  



Монгол Улсын эрүүл мэндийн салбарын тулгамдсан асуудлыг хэлэлцэж, цаашдын чиглэл, цар хүрээг тодорхойлж, бүх түвшний удирдах ажилтнуудыг нэгдсэн мэдээллээр хангаж, эрүүл мэндийн удирдлагын тогтолцоог бэхжүүлэх зорилготой уг зөвлөгөөнд УИХ, Засгийн газар, Эрүүл мэндийн яам, төрөлжсөн мэргэшлийн эмнэлэг, тусгай мэргэжлийн төв, аймаг, нийслэлийн Эрүүл мэндийн газар, Бүсийн оношилгоо эмчилгээний төв, Нэгдсэн эмнэлэг, сум, дүүрэг, өрхийн эрүүл мэндийн төв зэрэг төр, хувийн хэвшлийн эрүүл мэндийн байгууллага, Монгол Улс дахь Нэгдсэн үндэстний байгууллагын төрөлжсөн байгууллагын төлөөлөл зэрэг нийт 1000 гаруй удирдах ажилтан оролцсоноороо онцлог байлаа.



Зөвлөгөөнийг нээж УИХ-ын Нийгмийн бодлогын байнгын хорооны дарга Л.Энхнасан, ДЭМБ-ын Монгол дахь Суурин төлөөлөгч Соккоро Эскаланте нар үг хэлж, мэндчилгээ дэвшүүлсэн бол УИХ-ын гишүүн, Засгийн газрын гишүүн, Эрүүл мэндийн сайд Т.Мөнхсайхан  “Удирдлагын манлайлал, байгууллагын соёл” сэдвээр илтгэл тавилаа.

Тэрбээр илтгэлдээ, нийгмийн эрүүл мэндийн тусламж үйлчилгээний санхүүжилт ирэх 2025 онд нэмэгдэж байгааг дуулгаад Эрүүл мэндийн боловсролыг дээшлүүлэн эрүүл амьдралын хэв маягийг төлөвшүүлэх чиглэл барин ажиллаж буйгаа танилцууллаа.
Тодруулбал:
“Эрүүл шүд” - ЕБС-ийн нэгдүгээр ангийн сурагчдын дунд нүд, шү, зүрхний эмгэгийн эрт илрүүлгийн зохион байгуулах,
“Хорт хавдраас сэргийлэх, хянах” - Хавдар судлалын Үндэсний төвийн салбар эмнэлэг барих, хүний папиллома вирусний вакцинжуулалт, Тамхины хяналтын тухай хуулийн хэрэгжилт
“Эрүүл монгол” -  Архидан согтуурахтай тэмцэх хууль, Эрүүл мэндийг дэмжих сан,
“Эрүүл мэндийн боловсрол” – Эрүүл, аюулгүй сургууль хууль, сургуульд суурилсан эрүүл мэндийн тогтолцоог бий болгох зэрэг олон ажлуудыг хийхээр төлөвлөж, зарим ажлууд нь хэрэгжиж эхэлснийг дуулгалаа.



Түүнчлэн салбарынхаа хүний нөөцийг чадавхжуулж, эмнэлгийн тусламж үйлчилгээний чанар, хүртээмжийг сайжруулах чиглэлээр иргэдээ бус эмч, эмнэлгийн мэргэжилтнүүдээ гадагш нь явуулдаг болох бодлого барин ажиллаж байгаагаа онцоллоо.

Энэ ажлын хүрээнд Эрүүл мэндийн тусламж, үйлчилгээнд орчин үеийн дэвшилтэд технологи нэвтрүүлэх, Монгол Улсад эмчлэх боломжгүй өвчний эмчилгээг эх орондоо нутагшуулахад хүний нөөцийн чадавхийг бэхжүүлэх зорилгоор Үндэсний 13 багийг тухайн чиглэлийн үйл ажиллагаагаар тэргүүлэгч өндөр хөгжилтэй улс орнуудад суралцуулах ажлыг эхлүүлж, одоогийн байдлаар Аутизмын хүрээний эмгэг, Нярайн зүрхний хэм алдалт, Зүрхний титэм судасны хүнд хэлбэрийн нарийсал, судасны дисплазийн эмчилгээг эх орондоо нутагшуулахаар эмч нарын баг гадаад улсыг зориод байна.



Орон нутагт яаралтай тусламжийн тогтолцооны шинэчлэлийг хийж, тусламж үйлчилгээний төвлөрлийг сааруулах ажлын хүрээнд

Дээрх багууд нь тухайн орон нутгийн эрүүл мэндийн байгууллагын хүчний нөөцийг чадавхжуулах замаар тусламж үйлчилгээний хүртээмжийг сайжруулах юм. Мөн Сайд Т.Мөнхсайхан Эм, эмнэлгийн хэрэгслийн хяналт, зохицуулалтын тухай хуулийн хэрэгжилт, цахим шилжилт, ЭМД-ын хяналт, үнэлгээний тогтолцоо, хөрөнгө оруулалт зэрэг томоохон сэдвүүдээр мэдээлэл өгч, цаашид авах арга хэмжээнийхээ талаар дэлгэрэнгүй танилцууллаа.



Зөвлөгөөний үеэр Удирдлагын академийн багш, Менежментийн зөвлөх Ц.Өнөржаргал “Удирдлагын сэтгэлгээний шинэ хандлага”, ЭМЯ-ны Нийгмийн эрүүл мэндийн бодлогын газрын дарга Л.Баттөр “Коронавируст халдвар (КОВИД-19)-ын цар тахлын нийгмийн эрүүл мэндэд үзүүлсэн нөлөөлөл”, Стратеги төлөвлөлтийн газрын дарга П.Оюунцэцэг “Хүн амын эрэлт хэрэгцээнд нийцсэн тусламж, үйлчилгээний төлөвлөлт”, Эмнэлгийн тусламжийн бодлогын газрын дарга Р.Гантуяа “Эрүүл мэндийн анхан шатны тусламж, үйлчилгээнд баримтлах чиг хандлага” сэдвээр илтгэл хэлэлцүүллээ.



Үргэлжлүүлэн үдээс хойшхи зөвлөгөөнөөр Эрүүл мэндийн сайдын зөвлөх Л.Төмөрбаатар “Хорт хавдраас сэргийлэх, хянах” хөтөлбөрийг танилцуулж, ЭМДЕГ-ын  Бодлого төлөвлөлтийн газрын дарга Б.Батчимэг “Эрүүл мэндийн даатгалын сангаас худалдан авах тусламж, үйлчилгээний бодлого”, ЭМЯ-ны Стратеги төлөвлөлтийн газрын ахлах шинжээч Ч.Амаржаргал “Эм, эмнэлгийн хэрэгслийн чанар, хүртээмж”, ЭМХТ-ийн захирал Б.Нарантуяа “Төгсөлтийн дараах сургалтад удирдах ажилтны манлайлал” сэдвээр илтгэл тавьж, хэлэлцүүлэг өрнүүлэв.

Илтгэл танилцуулгатай холбогдуулан зөвлөгөөнд оролцогчид асуулт асууж, санал солилцсоноор эрүүл мэндийн салбарын удирдах ажилтны зөвлөгөөн өндөрлөлөө.