Европын компаниуд ногоон эрчим хүч, устөрөгч, агаарын тээвэр, усны менежмент, барилга зэрэг олон салбарт Египетийн компаниудтай хамтран ажиллахаар 40 тэрбум еврогийн хөрөнгө оруулалтын 20 орчим гэрээ байгуулжээ.

Арабын ертөнцийн хамгийн олон хүн амтай Египет улс бүс нутагтаа цэвэр эрчим хүчний төв болох бодлого баримталж байгаа юм. Европын холбоо уг бодлогыг дэмжин, Египетийн ногоон эрчим хүч, цахим сургалтын 25 сая еврогийн шинэ төслийг эхлүүлж байна.

Европын холбоо Египет улстай иж бүрэн стратегийн түншлэлийн хүрээнд хамтран ажиллаж, хөрөнгө оруулалтаа нэмэгдүүлж буй юм байна. Энэхүү түншлэлийн хэлэлцээрийн хүрээнд улс төрийн харилцаа, эдийн засгийн тогтвортой байдал, хөрөнгө оруулалт, худалдаа, цагаачлал, аюулгүй байдал зэрэг салбарт хоёр тал хамтын ажиллагаагаа өргөжүүлж байна.

Египет улс цэвэр эрчим хүчний төв болсноор ногоон эрчим хүч, устөрөгчийг зөөвөрлөх шинэ коридортой болохоос гадна Арабын булангаас Европ хүртэлх бүс нутгийг хамарсан цэвэр технологийн шинэ сүлжээг бий болгож байна.

Өнөөдөр Европ ихэнхдээ алс холоос зөөвөрлөдөг батарей, нарны хавтан, салхин үүсгүүрт найдаж байна. Иймээс цэвэр эрчим хүчний технологийг ойроос авдаг болохын тулд бид 40 тэрбумийн хөрөнгө оруулалтыг хийж байна гэж Европын комиссын Ерөнхийлөгч онцлон тэмдэглэжээ.

Сүүлийн 10-аад жилд гадаад валютын хомсдол, инфляцын өсөлтөд нэрвэгдсэн Египет улсыг эдийн засгаа сэргээхэд нь Европын холбоо мөн багц тусламж үзүүлж байгаа, өнгөрсөн 3-р сард үзүүлсэн багц тусламжид 107 сая хүн амтай Египетийг ирэх 3 жилд эдийн засгийн хүндрэлээ даван туулахад нь зориулж зээл тусламжийн аль алиныг багтаасан байна.

Энэ удаад Египетийн эдийн засгийн шинэчлэлийн хөтөлбөрийг дэмжих зорилгоор 1 тэрбум еврогийн богино хугацааны тусламж үзүүлэх санамж бичигт хоёр тал гарын үсэг зуржээ.