Ирэх зун Европт дахиад аагим халуун цаг агаар зонхилж мэдэхээр байгааг цаг уурчид анхааруулж эхлээд байна. Тэр дундаа Парисын Олимпын наадмын үеэр халуун агаарын урсгал дайрах эрсдэлээс шалтгаалж тамирчдын аюулгүй байдлыг хангах асуудал зохион байгуулагчдын санааг чамгүй зовоож байна. Үүнээс гадна сүүлийн 12 сарын хугацаанд дэлхийн хүн амын 80 хувь нь хэт халалтын 76 удаагийн давалгаанд өртөөд байгаа судалгааны дүн мөн гарчээ.

Өнгөрсөн жилээс эхэлсэн түүхэн дэх хамгийн халуун саруудын цуваа 11 дэх сараа үргэлжилж, Хойд Атлантын тэнгис орчмын далайн усны гадаргын температур сүүлийн 40 жилийн дээд үзүүлэлтэд хүрсэн байдалтай байгааг мэргэжилтнүүд онцолж байна.Улмаар Европ тивийн хэмжээнд ирэх зун дахиад хэт халж, ажиглалт тандалтын түүхэн дээд үзүүлэлт ахин эвдэгдэж болзошгүйг сэрэмжлүүлж байна. Эхнээсээ ирэх 7 хоногт Герман болон Скандинавын хойгт ердийнхөөс өндөр халах төлөв гарчээ. Европ даяар цаг уурын нөхцөл тэхдээ харилцан адилгүй, ирэх 6 сард Баруун Европт хур тунадас олон жилийн дундаж орчим байх бол, 7сард Өмнөд Европт дунджаас илүү, харин зүүн Европын нутгаар 8 сард илүү их халж, хуурайшилт ихсэхийг Weather & Radar цаг агаарын албаны цаг уурч Тэмсин Грин мэдээлжээ. Мэргэжилтнүүд Европт цаг агаар ийм хувьсамтгай болсонд олон хүчин зүйл нөлөөлж байгаагийн дотор, дэлхийн цаг агаар болон температурын хэлбэлзлийг гол тодорхойлогч Эль-Ниньо болон Ла-Нинья гэсэн хоёр үзэгдэл хоорондын шилжилтийн үе яг одоо дэлхийн бөмбөрцгийг нөмөрснийг хэлж байна. Ерөнхийдөө Европ тивд, цаг агаарын дулаарал хамгийн хурдацтай явагдаж, 1950-д оноос хойш энэ тивд 30 удаа онц их хэмжээний хэт халалт болсны 23 нь зөвхөн 2000 оноос хойш тохиосон. Энэ чиг хандлага энэ зун мөн үргэлжлэхийг АНУ-д төвтэй цаг уур тандалтын Atmospheric G2 пүүс бас танилцуулжээ. Эдний тооцооллоор, ирэх 7 сарын сүүл, 8 сарын эхээр Европт онц их халж, европын өмнөд бүсийн Грек, Хорват, Итали зэрэг улсыг нэрвэсэн 2022 оны хэт халалт давтагдаж болзошгүй байна.

Сүүлийн 12 сарын дотор Мексикээс Пакистаныг хүртэл маш олон бүс нутгийг хамарч үргэлжилж байгаа хэт халалтад дэлхийн хүн амын 80 шахам хувь буюу 6,3 тэрбум орчим хүн нэрвэгдсэн, Антарктидаас бусад бүх тивийн 90 улс хэт өндөр халалтын 76 удаагийн давалгаанд өртсөн болохыг “World Weather Attribution болон “Клаймит сентрал судалгааны байгууллагуудын судалгаа харуулжээ. Хэт халуун гэх ангилалд багтах өдрийн тоо, хэрвээ цаг уурын дулаарал болоогүй байсан бол одооныхоос 31-ээр цөөн байх байсныг мөн онцолжээ. Сүүлийн өдрүүдэд гэхэд Энэтхэг, Пакистаны зарим газар 45-52 цельсийн градуст хүрч онц аюултай хэмжээнд хэт халж байна. “Ийм огцом их халснаас болж нас барсан хүний тоо сүүлийн 12 сарын дотор хэдэн зуун мянга, магадгүй хэдэн сард хүрсэн байхыг үгүйсгэх аргагүй. Үер ус, далайн хар салхинаас учрах гамшиг сүйдэл ихэссэний адил хэт халалт ч мөн хүн ардын амь амьдралд асар их халгаатай байгаа”-г ОУУЗХ-ны енбд Жаган Чапагайн мэдэгджээ.