Америкийн цэргийг Өмнөд Солонгост байрлуулж байгаатай холбоотой зардлыг хуваах асуудлаар хоёр улсын албаныхан уулзалт хэлэлцээ эхлүүлжээ. Өмнөд Солонгост байрладаг 28,500 цэрэгтэй АНУ-ын баазын урсгал зардлыг хувааж гаргах асуудлаарх одоо үйлчилж байгаа хэлэлцээрийн хүчинтэй хугацаа ирэх 2025 онд дуусах гэж байгаа юм байна. АНУ-ын тал энэ тухайд “шударга, эрх тэгш үр дүн”-г эрэлхийлж энэ нь цаашлаад хоёр улсын эвслийг бэхжүүлэхэд тустай гэдэг байр сууринаас асуудалд хандаж байгааг Төрийн департамент Даваа гарагт мэдэгджээ.      

Төрийн департаментын мэдээгээр, БНСУ АНУ-ын хоорондох 12 дахь удаагийн хэлэлцээрийн асуудлаарх эхний уулзалт өнөөдрөөс пүрэв гараг хүртэл Хавай арлын Хонолулуд болж байгаа юм байна. 2026 оноос мөрдөх шинэ хэлэлцээрийн урьтал энэ яриа хэлэлцээнд хоёр тал төлөөлөгчдөө өнгөрсөн сард томилжээ. Үүний зэрэгцээ Өмнөд Солонгосын хэвлэлүүд ирэх 11 сард АНУ-д Ерөнхийлөгчийн сонгуулиас өмнө асуудлыг эцэслэхийг зорьж байгаа гэдэг мэдээллийг өгч байна. Учир нь ирэх ерөнхийлөгчийн сонгуульд одоогийн ерөнхийлөгч Байдентай халз тулгарах төлөвтэй байгаа Трамп өмнө засаглаж байхдаа Сөүлийг АНУ-ын цэргийн хүчин чадлыг “үнэ хөлсгүй ашигладаг”-т буруутгаж, басхүү жилд төлдөг зардлын хувийг 5 тэрбум ам.долларт хүргэх шаардлага тавьж байсан. Улмаар олон сарын хэлэлцээний эцэст Сөүлийн үүрэх хувийг өмнөх 2019 оны хэлэлцээртэй нь харьцуулахад 13,9 хувиар нэмэгдүүлж, жилд 920 сая орчим ам.доллар төлдөг болгож байжээ. Байдений засаг захиргааны өндөр тушаалын төлөөлөгч тэгвэл яриа хэлэлцээ төлөвлөгөөний дагуу, гэхдээ АНУ 11 сарыг “эцсийн хатуу хугацаа” гэж үзэхгүй байгаа гэж Ройтерст ярьсан байна.

Өмнөд Солонгосын тал мөн АНУ-д шинэ ерөнхийлөгч сонгогдлоо ч одоогийн харилцаанд ямарваа суурь өөрчлөлт гарна гэж үзэхгүй байгаа, мөн энэ онд багтаад зардлын хуваарилалтын асуудлаарх хэлэлцээнд ахиц гарна гэж найдаж байгааг өнгөрсөн сард мэдэгдэж байжээ. Өмнөд Солонгос дахь АНУ-ын цэргийн хүчин өнөөдрийн байдлаар 28,0 гаруй цэрэгтэй, 1953 онд хоёр Солонгос түр эвлэрлийн гэрээгээр дайтахаа зогсоосон цагаас тус цэргийн хүчин Умард Солонгосын зүгээс болзошгүй халдлагаас Өмнөдийг хамгаалах үүрэг зорилготой гэж тооцогддог.