Зам, тээврийн хөгжлийн сайд С.Бямбацогт өнөөдөр /2024.04.17/ Азийн хөгжлийн банкны Ухаалаг тээврийн хэлтсийн дарга Канзо Накайтай уулзаж, автотээврийн салбарын хамтын ажиллагааны талаар санал солилцлоо.

Монгол Улсын урт хугацааны хөгжлийн бодлого “Алсын хараа 2050”, дунд хугацааны Шинэ сэргэлтийн бодлогод нүүрстөрөгч багатай, бүтээмжтэй, хүртээмжтэй ногоон хөгжлийг бүрдүүлэх, эрүүл, аюулгүй, ээлтэй орчинд амьдрах зорилго, зорилтууд тусгагдсан.

Сайд С.Бямбацогт Азийн хөгжлийн банктай хамтран цахилгаан автомашины дэд бүтцийг дэмжих төсөл, цахилгаан болон хайбрид автомашины литуим батерейг аюулгүй устгах үйлдвэр байгуулах төслийг хамтран хэрэгжүүлэх санал тавилаа.

Мөн Азийн авто замын сүлжээний АН4 автозам болон бусад чиглэлийн олон улс, улсын чанартай авто замуудад замын хөдөлгөөний аюулгүй байдлын хяналт, мониторингийн систем нэвтрүүлэн, ослоос урьдчилан сэргийлэх төслүүдийг хамтран хэрэгжүүлж ажиллах саналтай байгаагаа онцоллоо.

Ташрамд дурдахад, өнөөдрийн байдлаар Монгол Улсад 717 цахилгаан тээврийн хэрэгсэл бүртгэлтэй байгааг 30 мянгад хүргэх, цэнэглэх станцыг 1000-ыг байгуулахаар төлөвлөсөн.

Үүнээс гадна цахилгаан болон хайбрид тээврийн хэрэгслээс ялгарах аюултай хог хаягдлыг дахин боловсруулах асуудлыг нэн тэргүүнд шийдвэрлэх хэрэгцээ, шаардлага үүссэн.

Монгол Улсын хэмжээнд өнөөдрийн байдлаар 670 мянган хосолсон хөдөлгүүртэй тээврийн хэрэгсэл байна. Үүнээс 717 цахилгаан автомашин ашиглагдаж байгаа бөгөөд эдгээрийн тээврийн хэрэгслийн 33.7 хувь нь 10-аас дээш жилийн насжилттай хуучин автомашин.

Япон Улсаас орж ирж буй литиум батерейны ашиглалтын хугацаа дууссан, дуусах дөхсөн хуучин хосолсон хөдөлгүүртэй автомашины импорт их байгаа тул аюулгүй устгах, дахин боловсруулах шаардлагатай байгаа юм.