Уралын нурууны цасан бүрхүүл хайлж байгаагаас их хэмжээний шар усны үер ОХУ, Казахстаны хил орчмыг дайран өнгөрч байна. Энэ жилийн шар усны үер ердийн жилүүдийн дунджаас илүү их байгаа тул зарим суурингуудаас иргэдийг нүүлгэн шилжүүлэхээс өөр аргагүйд хүрч байна. Европдоо гуравдугаарт ордог Урал мөрөн далангаа сэтэлж үерлэсэн гэсэн мэдээлэл байна. Казахстаны хилтэй ойр ОХУ-ын Оренбург хот их хэмжээний шар усны үерийн аюулд бэлтгэж байна.

500 мянган хүн амтай Оренбург хот Урал мөрний ай саваас 300 км-ийн зайд оршдог. Энэ удаа тус хотыг дайрч болзошгүй үерийн усны түвшин олон жилийн дунджаас давах төлөвтэй байна. Энэ хотоос гадна Уралын нурууны орчим, баруун Сибирийн нутгууд, Волга мөрний ай сав үерлэсэн. ОХУ-ын онцгой байдлын яамны мэдээллээр 10 мянга орчим байшин үерийн усанд үйгдсэн байна. Цаг агаар эрчимтэй дулаарч байгаагаас уулын мөс цас хурдтай хайлж, гол мөрнүүд үерлэж байна гэж тайлбарлаж байна. Москва хотоос 1500 км-ийн өмнө оршдог Оренбург хотод Урал мөрний үерлэсэн ус Лхагва гарагт хамгийн их болно гэсэн мэдээллийг мөн өглөө. Үерийн ам, гол мөрний ай саваар оршин суудаг айлууд нэн даруй орон гэрээ орхих шаардлагатай гэж Оренбург хотын дарга мэдэгдлээ. Энэ хотын орчмоос одоогоор 6000 орчим хүн нүүлгэн шилжүүлэлтэд хамрагдаад байна. Энэ хотоос гадна Уралын нурууны зүүн бэл орчмын Курган, Тюмень хотууд Даваа гарагт онц байдал зарлаж, хүмүүсийг нэн даруй нүүхийг шаарджээ.

ОХУ-ын ерөнхийлөгч Владимир Путин засгийн газартаа хандаж үүссэн онц байдлыг зохицуулах комисс гаргахыг хүсжээ. Одоогоор үерт хамгийн их өртөж хохирол амссан Орск хотын иргэд эрх баригчдыг урьдчилан сэргийлэх, авран хамгаалах арга хэмжээ авсангүй гэж буруутгаж байгаагаа илэрхийлж байна. Тэгвэл Казахстаны хил орчимд 10 хот сууринаас хэдэн арван мянган хүнийг мөн нүүлгэн шилжүүлсэн байна. Казахстан улсын ерөнхийлөгч Касым Жомарт Токаев энэ улсад сүүлийн 80 жил тохиогоогүй байгалийн гамшигт үзэгдэл болж байна гэж тодорхойлжээ.