Хүн амд эрүүл мэндийн боловсрол олгож, бүх нийтээр эрүүл амьдралын хэв маягийг хэвшүүлэн, эрсдэлт хүчин зүйлсийг арилгахын тулд нийгмийн эрүүл мэндийн тусламж, үйлчилгээг зохион байгуулах, удирдах, санхүүжүүлэх, хяналт тавих үйл ажиллагааг зохицуулах Нийгмийн эрүүл мэндийн тусламж, үйлчилгээний тухай анхдагч хуулийг УИХ энэ оны нэгдүгээр сарын 12-ны өдрийн хуралдаанаараа баталсан бөгөөд 2024 оны дөрөвдүгээр сарын 1-нээс буюу яг өнөөдрөөс хэрэгжиж эхэллээ.
Нийгмийн эрүүл мэндийн тусламж үйлчилгээний тухай анхдагч хуулийг өнгөрсөн бямба гаригт болсон “Эмч танаараа бахархъя” олон улсын эмч нарын баярт зориулсан арга хэмжээний үеэр УИХ-ын дэд дарга Л.Мөнхбаатар гардуулж өгсөн.
Эрүүл мэндийн сайд С.Чинзориг энэ хууль батлагдсанаар нийгмийн эрүүл мэндийн тусламж, үйлчилгээний нэгдсэн тогтолцоо бий болж, нийгмийн эрүүл мэндийн тусламж, үйлчилгээг төсвөөс санхүүжүүлэх эрх зүйн орчин бүрдэж, байгууллага, иргэдийн оролцоо нэмэгдэнэ гэж үзэж байгаагаа хуваалцсан.
Тэрбээр “Зохион байгуулалтын хувьд нийгмийн эрүүл мэндийн тулгамдсан асуудлыг хэлэлцэх, салбар дундын үйл ажиллагааны уялдаа холбоог хангах чиг үүрэг бүхий Нийгмийн эрүүл мэндийн орон тооны бус үндэсний зөвлөл Ерөнхий сайдын дэргэд ажиллаж, Өвчний хяналт, сэргийлэлтийн төв байгуулна. Орон нутагт аймаг, дүүргийн Нийгмийн эрүүл мэндийн төв, Өрх, сум, тосгоны эрүүл мэндийн төвүүд болон нийт эрүүл мэндийн байгууллагын нийгмийн эрүүл мэндийн нэгж/алба хүн амд тусламж үйлчилгээг хүргэхээр хуульчилсан.  
Иймд хүн амд нийгмийн эрүүл мэндийн тусламж үйлчилгээг хүргэхэд нийт эмч, эрүүл мэндийн ажилтнууд оролцох, нэн ялангуяа иргэний эрүүл мэндийн боловсролыг дээшлүүлэх үйл хэрэгт бүх шатны эрүүл мэндийн байгууллагууд мэргэжил арга зүйн дэмжлэг үзүүлж, санаачилгатай ажиллах үүрэг хүлээж байна.
Монгол Улсын Засгийн газрын шийдвэрээр “Эрүүл шүд”, “Иргэний эрүүл мэндийн боловсролыг дээшлүүлэх арга хэмжээ”-г батлуулан, ирэх дөрвөн жилийн хугацаанд хэрэгжүүлэх  цогц арга хэмжээний төлөвлөгөөг нийт таван яамны оролцоотой хамтран баталж,  хэрэгжүүлж эхлээд байгаа. Төлөвлөгөөг хэрэгжүүлэхэд эмч, эрүүл мэндийн мэргэжилтнүүдийн оролцоо, хамтын ажиллагаа нэн чухал бөгөөд эмч, эмнэлгийн мэргэжилтэн бүр  иргэд, олон нийтэд эрүүл амьдралын хэв маяг эзэмшүүлэх тэдний хандлагыг өөрчлөх, зөвлөгөө өгөх чадавхыг бэхжүүлж, эрүүл мэндийн байгууллага бүр эрүүл мэндийг дэмжих орчин бүрдүүлэх юм” хэмээсэн.