Эмч нарын өдрийг 1933 оны гуравдугаар сарын 30-нд АНУ-ын мэс заслын эмч нар мэргэжил нэгт эмчдээ хүндэтгэл үзүүлэхээр анх тэмдэглэсэн түүхтэй. Тус улс энэ өдрийг 1990 оноос Үндэсний эмч нарын өдөр болгосон. Улмаар Дэлхийн эмч нарын холбоо энэ өдрийг эмч нарын үзэл бодлоо чөлөөтэй илэрхийлэх, ажил, мэргэжлийн үүднээс нийгмийн баталгааг хангуулах, эмч нарт хүндэтгэл үзүүлэх өдөр болгохоор улс орнуудыг уриалснаар өдгөө дэлхийн олон оронд өргөнөөр тэмдэглэдэг болсон байна.
Манай улс энэ өдрийг эрүүл мэндийн салбарыг хөгжүүлэх, хүн ардынхаа эрүүл мэндийг сахин хамгаалах үйлсэд үр бүтээлтэй ажиллаж, онцгой амжилт гаргасан эмч нарыг алдаршуулах, эмчийн хөдөлмөрийн үнэлэмжийг дээшлүүлэх, эмчилгээ, оношилгоо, үйлчилгээний ажлын шилдэг арга туршлагыг олон нийтэд сурталчлах, дэлгэрүүлэн таниулах зорилготой олон талт үйл ажиллагааг зохион байгуулж тэмдэглэдэг.



Монгол Улсын Засгийн газар, Эрүүл мэндийн яамнаас өнгөрсөн жилээс эхлэн энэ өдрийг эмч нараар бахархах, тэднийг дэмжих, тулгамдсан асуудлыг нь шийдэх гарц шийдлийг хамтдаа эрэлхийлэх ажил хэрэгч байдлаар тэмдэглэж байх санаачлага гаргасан. Тэр хүрээндээ “Эмч танаараа бахархъя” арга хэмжээг өнөөдөр UG arena цогцолборт улс орны өнцөг булан бүрээс ирсэн 2500 эмчийг оролцуулан зохион байгуулж байна.



“Эмч танаараа бахархъя” хүндэтгэлийн арга хэмжээг Эрүүл мэндийн сайд С.Чинзориг нээж Монгол Улсын бүх шатны эрүүл мэндийн байгууллагад ажиллаж, хүн ардынхаа эрүүл энхийн манаанд цаг наргүй зүтгэж буй анагаах эрдэм мэдлэг, авьяас, туршлага хосолсон эмч нарт Олон улсын эмч нарын өдрийн мэндийг дэвшүүллээ. 
Тэрбээр “Эмч нарын нийгэм, хувь хүний амьдралд оруулсан хувь нэмрийг дэлхий нийт, улс орон, гэр бүл, хувь хүн бүгд хүлээн зөвшөөрдөг. Бүх улс орнууд эрүүл мэндийн салбарынхныг хөдөлмөр зүтгэл, эмчийн нинжин сэтгэл, мэргэжлийн ур чадварыг өндрөөр үнэлдэг гэдэгт итгэлтэй байдаг.
Эрүүл мэндийн салбар бол дэлхийн хамгийн чухал салбаруудын нэг. Анагаах ухаанд үргэлж ахиц дэвшил гарч, эмч нар өдөр бүр янз бүрийн эмгэгтэй нүүр тулж, оношилж, эмчилж, зөвлөж байна. Өвчин эмгэг хэлж ирдэггүй, хийсч ирдэг. Энэ үед эмч хүн л амь насыг аврахад үргэлж бэлэн байдалд байдаг.
Манай улсын  эмч нар дэлхийн анагаах ухааны орчин үеийн шилдэг технологи, хиймэл оюун ухаанд суурилсан эмнэлгийн тусламж, үйлчилгээг нэвтрүүлэн нутагшуулж, Монгол хүн эх орондоо олон улсын жишигт хүрсэн оношилгоо, эмчилгээ хийлгэх боломж улам нэмэгдсээр байна.
Монгол Улсын хүн ам 1921 онд 650 мянга байсан бол одоо 3 сая 600 мянга гаруй болж, хүн амын өсөлт эрчимтэй явагдаж, дундаж наслалт 40-өөс 70 хүртэл нэмэгдсэн нь хүн амын эрүүл мэндэд төрөөс онцгой анхаарч ирсэнтэй холбоотой юм.
Эрүүл мэндийн салбарын төсөв, хүний нөөц жилээс жилд нэмэгдэж, оношилгоо, эмчилгээний шинэ техник, технологиуд нэвтэрч, тоног төхөөрөмжийн хангалт эрс сайжирсан.
Улсын хэмжээнд 4,500 гаруй эрүүл мэндийн байгууллага үйл ажиллагаа явуулж, 14000 орчим их эмч, нийт 56,000 гаруй эрүүл мэндийн ажилтнууд хүн амын эрүүл мэндийн төлөө зүтгэж байна.
Олон улсын эмч нарын өдрийн өмнөхөн Эрүүл мэндийн сайд миний бие Улсын гуравдугаар төв эмнэлэг, Гэмтэл согог судлалын үндэсний төв, хөдөө орон нутагт ажиллаж, эмч, эмнэлгийн мэргэжилтний болон  эмнэлгийн үйл ажиллагаанд тулгарч буй хүндрэл, бэрхшээл, эмнэлгийн тусламж, үйлчилгээний чанарын баталгаажилтыг хангуулах талаар санал солилцсон бөгөөд дэмжих, үйл ажиллагааг жигдрүүлэх талаар холбогдох шийдвэрүүдийг  гаргасан билээ.
Эрхэм хүндэт эмч нар аа, Эрүүл Монгол хүн эх орноо хөгжүүлнэ, эрүүл Монгол Улсыг цогцлоон хөгжүүлэх эрхэм үүрэг эмч Та бүхэнд байна.
 Хүнлэг энэрэнгүй, ёс суртахуунтай, мэргэжлийн өндөр ур чадвартай эмч бол Монгол Улсын хөгжлийн нэг чухал тулгуур юм. Тийм ч учраас эмч хүн “эмчийн ёс зүй, төрийн хуулийг чандлан сахиж, эрдэнэт хүний амь нас, эрүүл мэндийн төлөө эрдэм чадал, энэрэх сэтгэлээ харамгүй зориулахаа” тангарагладаг.
Нийт эмч нартаа дахин Олон улсын эмч нарын өдрийн мэндийг хүргэж, эрүүл энх, аз жаргал, амжилт бүтээлийн дээдийг хүсэн ерөөж, эрдэнэт хүмүүний эрүүл мэндийг хамгаалах ариун үйлс, нөр их хөдөлмөрт тань улам их амжилт хүсье” гэсэн юм.



Нээлтийн үйл ажиллагаанд Ерөнхийлөгчийн Эрүүл мэнд, спорт, нийгмийн бодлогын зөвлөх Т.Мөнхсайхан, Монгол Улсын Шадар сайд С.Амарсайхан, УИХ-ын дэд дарга Л.Мөнхбаатар, ДЭМБ-ын Монгол дахь Суурин төлөөлөгч Др.Сокорро Эскаланте нар мэндчилгээ дэвшүүлж үг хэлсэн.



Мөн энэ үеэр УИХ-аар баталсан Нийгмийн эрүүл мэндийн тусламж үйлчилгээний тухай анхдагч хуулийг гардуулж өгөх ёслол болж, Монгол Улсын Ерөнхийлөгчийн зарлигаар төрийн одон, медаль гардсан хүмүүст шагналыг нь гардуулж өглөө.



“Эмч танаараа бахархъя” арга хэмжээ зөвхөн баяр биш, энэ өдөр эмч нар салбарынхаа тухай яриа өрнүүлж, хийж хэрэгжүүлж буй ажлуудын талаар мэдээлэл сонсож, тулгамдсан асудлаараа санал бодлоо чөлөөтэй солилцох учиртай. Тиймээс үндсэн илтгэлийг Эрүүл мэндийн сайд С.Чинзориг “Шинэ сэргэлтийн бодлого-эрүүл мэнд” сэдвээр тавьж салбар хуралдаануудыг “Анхан шатны эрүүл мэндийн тусламж үйлчилгээний шинэчлэл”, “Эрүүл мэндийн даатгалын шинэчлэл”, “Нийгмийн эрүүл мэндийн тусламж үйлчилгээний шинэчлэл”, “Эмийн чанар, аюулгүй байдал” сэдвээр зохион байгуулсан. Оролцогчид өөр өөрийн сонгосон салбар хуралдаанд оролцож, шинэ мэдээ мэдээлэл сонсохын хамт санаа бодлоо солилцож, чөлөөт ярилцлага өрнүүллээ.