Дөрөвдүгээр сарын 1-ний өдрөөс эхлэн “Сонгогчдын нэрийн жагсаалтыг цахим хуудас”-нд байршуулна.

УИХ-ын 2024 оны ээлжит сонгуулийг зохион байгуулах цаг хугацааны хуваарьт зааснаар дөрөвдүгээр сарын нэгний өдрөөс эхлэн зургаадугаар сарын 28-ны өдрийг дуустал “Сонгогчдын нэрийн жагсаалт”-ыг байршуулах болно.

Улсын бүртгэлийн асуудал эрхэлсэн төрийн захиргааны байгууллага сонгогчдын нэрийн жагсаалтад байгаа сонгуулийн эрх бүхий иргэний эцэг, эхийн нэр, өөрийн нэр, нас, хүйс, иргэний бүртгэлийн дугаар, байнга оршин суугаа газрын хаягийн бүртгэл мэдээллийг аймаг, сум, баг, хэрвээ хотод бол нийслэл, дүүрэг, хороогоор болон хэсэг нэг бүрээр нэгтгэн гаргана.

Энэ жагсаалтыг дөрөвдүгээр сарын нэгнээс эхэлж, сонгууль дуустал өөрийн цахим хуудсанд байршуулах болно.

Тэгвэл иргэд сонгох эрхээ эдлэхийн тулд иргэний бүртгэлээ хэрхэн хянаж баталгаажуулах вэ. Энэ талаар СЕХ-ны “Мэдээлэл судалгаа сургалтын төв”-ийн реферэнт н.Нямсүрэнгээс тодруулснаа сонсгоё.

УИХ-ын Сонгуулийн тухай хуульд зааснаар сонгогч сонгогчдын нэрийн жагсаалтад бүртгэгдсэн эсэхээ санал авах өдрөөс 14-өөс доошгүй хоногийн өмнө шалгасан байвал зохино.

Сонгогч сонгогчдын нэрийн жагсаалт дахь өөрийн болон гэр бүлийн гишүүний мэдээлэлтэй танилцах эрхтэй бөгөөд сонгогчдын нэрийн жагсаалтад бүртгэгдээгүй, эсхүл буруу бүртгэгдсэн бол өөрийн болон гэр бүлийн гишүүний нэрийн өмнөөс гомдлоо итгэмжлэгдсэн ажилтан, эсхүл Улсын бүртгэлийн байгууллагад санал авах өдрөөс 14-өөс доошгүй хоногийн өмнө бичгээр болон цахимаар гаргана.

Улсын бүртгэлийн асуудал эрхэлсэн төрийн захиргааны байгууллага иргэний улсын бүртгэлийн мэдээллийн санг үндэслэн энэ хуулийн 23.1-д заасны дагуу гомдол гаргасан иргэний мэдээллийн талаар болон иргэний улсын бүртгэлтэй холбоотой өөрчлөлтийн талаар лавлагаа гаргах ба сонгогчийн мэдээлэлтэй холбогдсон өөрчлөлтийг санал авах өдрөөс гурваас доошгүй хоногийн өмнө сонгогчдын нэрийн жагсаалтад оруулна. 

Энэ хуульд зааснаас бусад үндэслэлээр сонгогчдын нэрийн жагсаалтад өөрчлөлт оруулахыг хориглоно.

Сонгогчдын нэрийн жагсаалт зөвхөн нэг нэрийн жагсаалтаас бүрдэх бөгөөд энэ хуульд заасныг зөрчин сонгогчдын нэрийн жагсаалт шинээр үйлдэх, түүнд өөрчлөлт оруулахыг хориглоно.