Хөвсгөл аймгийн Бүрэнтогтох сумын “Зусын гарам" гэдэг газар голын мөсөн дээгүүр зорчиж явсан хоёр зорчигчтой суудлын автомашин мөс цөмөрч жолоочийн хамт живсэн, 1 зорчигч нь эсэн мэнд гарсан дуудлагаар Хөвсгөл аймгийн Эрэн хайх, аврах салбарын алба хаагчид ажиллалаа.

Алба хаагчдыг очиход иргэн Б-ын “Toyota Prius-20” загварын суудлын автомашин голын мөс цөмөрч эргээс 13 метр зайд жолоочийн хамт живсэн.

Гурван цаг ажиллаж иргэн 45 настай, эрэгтэй М-ийн цогцсыг гаргаж аймгийн Цагдаагийн газрын мөрдөн байцаагчид шилжүүлэн өгсөн байна.

Ойрын өдрүүдэд цаг агаар дулаарч цас, мөс хайлж байгаа тул хөдөө орон нутагт зорчихдоо хаврын шар усны үер болон мөс цөмрөх аюулаас сэрэмжтэй байхыг онцгойлон анхаарууллаа.

Түүнчлэн өнгөрөгч хоногт байшин, гэр, хогийн цэг шатсан зургаан дуудлагаар алба хаагчид ажиллалаа гэж Онцгой байдлын ерөнхий газраас мэдээллээ.