Энэ зун 120 мянган жил тохиож байгаагүй хамгийн халуун зун болж байна. Дэлхийн өнцөг булан бүрд ийнхүү ердийн үеэс хэт халж байгаа үед яаралтай олон янзын арга хэмжээг авсаар байна. Нэгдсэн Үндэсний Байгууллагын зүгээс, дэлхий нийтээрээ буцлам халуун нөхцөлд амьдарч байна гэж өнгөрсөн долоо хоногт анхааруулж байсан. Дэлхий нийтээрээ хэт халуунтай тэмцэж байгаа энэ үед хамгийн аюулд өртөхүйц, эмзэг тусаж байгаа хэсэг нь бага орлоготой иргэд, өвчтэй, ганцаараа амьдардаг хүмүүс, орон гэргүй хүмүүс, мөн дүрвэгсдийн хуаранд амьдардаг хүмүүс багтаж байгаа юм.

Хэт халуунд өөртөө тусламж үзүүлэх чадваргүй, эмнэлгийн тусламж шаардлагатай, хэвтэн эмчлүүлж байгаа хүмүүст мөсөөр дүүргэсэн хөнжил нөмрүүлэх зэрэг аргыг эмнэлгийн ажилчид хэрэглэж байгааг мэдээлж байна. АНУ, Хятад зэрэг оронд, зарим нутгаар цельсийн 50 градус давж халж байгаа нь иймэрхүү гарц шийдэл олоход хүргэж байна гэжээ. Япон улсад гэхэд хүнд нөхцөлд ажилладаг үйлдвэрийн ажилчид хэт халуунд өртөн хохирч байгаад ихээхэн санаа зовниж, яаралтай арга хэмжээ авах ёстой талаар засгийн газрын зүгээс анхааруулж байгаа юм. Мөн АНУ-д  бага орлоготой айл өрхүүд төвийн агааржуулах системд холбогдоогүй байдаг. Төвийн агааржуулах систем сарын 25 мянган ам доллар орчим үнэ өртөгтэй байдаг нь айл бүрийн хэрэглээ болоход хүндрэлтэй. Тиймээс энэ халуун цаг үед чөлөөтэй агаар амьсгална гэдэг тансаг хэрэглээ болоод байна гэдгийг иргэд хэлж байгаа юм. Тэгвэл Ойрх Дорнодод мөн хэт халалт нэмэгдэж, 45-47 градуст хэлбэлзэж байна. Яг энэ үед Сирийн иргэний дайнаас болж байнгын оршин суух газаргүй болсон, дүрвэгсдийн хуаранд амьдардаг хүмүүст хэт халуун тэсэхийн аргагүй байна гэдгийг илэрхийлж байна. Дүрвэгчид ихэнх нь майханд амьдардаг, тэнд нь агааржуулагч байхгүйгээс гадна, майхан хүлэмж шиг нөлөө үзүүлдгээс халуун зуныг давахад хэцүү байна гэжээ. Тиймээс том мөсөн блокуудаар хуаранг сэрүүцүүлэх ажлыг хийж байна гэдгийг дүрвэгсдийн хуаран байрладаг Иракийн албаныхан мэдээлж байна. Яг энэ мэтчилэн, сэрүүцэх нөхцөл, боломж хязгаарлагдмал хүмүүст хэт халалт онцгой аюултай байгааг анхааруулж байна.