Украин улсын аюулгүйн байдлын алба 40 сая ам.долларын үнэ бүхий зэвсгийн хууль бус наймааны сүлжээ олж илрүүлсэн гэж мэдээлсэн байна. Энэ хэрэг 2 жилийн турш ОХУ-тай дайтаж, хүч тарамдсан Украин улсад хүнд цохилт боллоо гэж олон улсын ажиглагчид үзэж байна. Тэр дундаа Европын Холбоонд элсэхэд маш ойрхон байгаа Украины хувьд дотоодын энэ хууль бус зэвсгийн наймаа, авлигын сүлжээ маш том дарамт болно гэж харж байгаа юм байна. Энэ хэргийг Украины батлан хамгаалах яам баталсан байгаа юм.

Украины аюулгүй байдлын албаны мөрдөн шалгах ажиллагааны явцад уг хууль бус наймаатай холбоотой Батлан хамгаалах яамны хэд хэдэн албан тушаалтныг, мөн урьд нь ажиллаж байсан эрх мэдэлтнүүдийг илрүүлсэн. Тус албан тушаалтнууд 2022 оны 11-р сард Львов Арсенал гэх нэр нь танигдаагүй жижиг компанитай гэрээ байгуулж, энэ хууль бус сүлжээ эхэлсэн гэж үзэж байгаа юм байна. Улмаар 40 сая доллар буюу 1 тэрбум 500 сая украин гривнягийн үнэ бүхий зэвсэг хууль бус наймааны нэг хэсэг болсон гэж дүгнэжээ. Зэвсгийг тоогоор нь үзүүлбэл барагцаагаар 100 мянган миномёт буюу богино голтой их бууг хууль бусаар наймаалжээ. 2022 оны намар Львов Арсеналтай гэрээ байгуулмагцаа яамны албан тушаалтнууд төлбөрөө шууд төлсөн, зарим төлбөр гадагш урссан гэж мэдээлж байна. Төлбөр төлөгдсөн боловч зэвсэг огт Украины армид нийлүүлэгдээгүй гэж мөрдөн шалгах ажиллагааны явцад илэрсэн байна. Одоогоор энэ хэрэгтэй холбоотой батлан хамгаалах яамны болон Львов Арсенал компанийн гээд 5 хүнийг сэжигтнээр татаад байгаа. Тэдний нэг нь Украины хил давах гэж байгаад баригдсан гэсэн мэдээлэл байна.

Украин улсад ийм авлига, хууль бус зэвсгийн наймаа хэзээний том асуудал байж ирсэн. Ялангуяа Европын Холбоонд гишүүнээр элсэхэд нь хамгийн том саад болдог хүчин зүйл нь авлигын асуудал. Өнгөрсөн хугацаанд Украин улс авлигын хэргийг багасгаж, авлигатай тэмцэх хууль эрхзүйн тогтолцоогоо сайжруулах Европын Холбооны шаардлагыг хэрэгжүүлэхээр дайны хажуугаар чухалчилж ажилласан.  Гэвч энэ удаагийн хэрэг Европын Холбоонд элсэх Украины замд саад тотгор болно гэж олон улсын ажиглагчид харж байна.