НҮБ-ын Ойрх Дорнод дахь палестинчуудад туслах агентлагийн ажилчдыг өнгөрсөн оны 10-р сарын 7-ны өдөр болсон Хамас бүлгийн израилчуудын эсрэг халдлагатай холбоотой гэж сэжиглэж эхэлсэн. Улмаар энэ байгууллагыг санхүүжүүлдэг томоохон донор улсууд хүмүүнлэгийн тусламжаа царцаах шийдвэр гаргасан байна. НҮБ-ын палестинчуудад туслах агентлагийн дарга улс орнуудын энэ шийдвэрийг “палестинчуудыг олноороо нийлж шийтгэж байгаа хэлбэр” гэж үзэж байгаагаа илэрхийлсэн бол НҮБ-ын ерөнхий нарийн бичгийн дарга Антонио Гуттериш мөн эдгээр улсуудыг хүмүүнлэгийн тусламжаа зогсоохгүй байхыг хүссэн байна.

АНУ-ын эх сурвалжийн мэдээлж байгаагаар одоогоор НҮБ-ын палестинчуудад туслах агентлагийн 12 ажилтныг Хамас бүлгийн түрэмгийлэлтэй холбоотой гэж мөрдөн шалгаж байгаа юм байна. Палестинчуудад туслах агентлаг нь анх 1949 онд Израил-Палестины дайн эхэлснээс жилийн дараа байгуулагдаж, дүрвэсэн палестинчуудад туслах үүргийг гүйцэтгэж ирсэн, НҮБ-ын хамгийн том агентлаг юм. Одоогийн байдлаар Газын зурваст нийт 13 мянга орчим ажилтантай. Энэ бүс нутгийн эмнэлэг, хүмүүнлэгийн тусламжийг хариуцаж байгаа хамгийн том байгууллага. Энэ байгууллагын санхүүжилт зогссоноор Газын зурваст оршин суугаа 2 сая 300 мянган хүний амь нас дээсэн дөрөөн дээр ирж, бүхэлдээ өлсгөлөнд нэрвэгдэнэ гэж агентлагийн дарга Филиппе Лаззарини мэдэгдсэн. Санхүүжилтээ царцаасан улсуудад АНУ, Их Британи, Герман, Канад, Австрали, Нидерланд, Финланд, Швейцар, Итали, Франц, Япон улсууд багтаж байна. Франц улс гэхэд өчигдөр гаргасан мэдэгдэлдээ НҮБ-ын палестинчуудад туслах агентлагт 2024 оны эхний улиралд ямар ч санхүүжилт олгох боломжгүй гэдэг шийдвэрийг танилцуулсан. Европын Холбооны гадаад хэргийн сайд Жозеф Боррель НҮБ-ын нэр нь дурдагдаж байгаа агентлагийн ажилчид Хамас бүлэгтэй холбоотой эсэх нь тогтоогдсон цагт цааших арга хэмжээг авна гэж мэдэгдсэн байна. Япон улс ч мөн Ням гарагт гаргасан шийдвэртээ ижил зүйл дурдсан байна. Эдгээр улс орныг санхүүжилтээ царцаах шийдвэрээ буцаахыг НҮБ-ын ерөнхий нарийн бичгийн дарга хүссэнээс гадна Ойрх Дорнодын хэд хэдэн улс уг шийдвэрт сэтгэл дундуур байгаагаа илэрхийлсэн байна.

Мухаммед Штайе Палестины Ерөнхий сайд "НҮБ-ын палестины дүрвэгчдэд туслах агентлагийн ажилчдын эсрэг үүсгэсэн энэ хэргийг мөрдөн шалгалтаар тогтоогдтол Израил улс үндэслэлгүй ял тулгахаа болих хэрэгтэй. Мөрдөн шалгалтын хариу гараагүй байхад маш олон улс энэ байгууллагад өгдөг санхүүжилтээ царцааж байгаад маш их гайхаж байна. Санхүүжилтээ царцааж байгаа орнуудын өгдөг хөрөнгө мөнгө энэ байгууллагыг жилийн төсвийн 70 хувийг бүрдүүлдэг. Энэ шийдвэрээ баталгаажуулбал Газын зурвасын нөхцөл байдал гамшгийн хэмжээнээс давах болно" гэж ярилаа.

Палестины Ерөнхий сайд Мухаммед Штайе өөрийн мэдэгдэлдээ үргэлжлүүлэн, Олон улсын шүүх Израилыг геноцидын хэргээр шүүн хэлэлцэж байгаа энэ үед НҮБ-ын палестинд туслах агентлагт үзүүлэх санхүүжилтийг царцааж байгаа нь шүүхийн үйл явцыг саатуулах гэсэн арга гэж үзэж байгаагаа илэрхийлсэн байна. Мөн дэлхий дахиныг хүмүүнлэгийн хүнд хэцүү нөхцөлд байгаа хүмүүст тусалдаг байгууллагыг шүүж шийтгэх бус хэдэн сая хүнийг дотооддоо дүрвэхэд хүргэж, 26 мянган хүний амь насанд халдсан Израил улсыг шүүн шийтгэх ёстой гэж мэдэгджээ. Энэ хэрэг дээр Палестины ерөнхий сайд байр сууриа илэрхийлснээс гадна Египет, Иордан улсууд сэтгэл дундуур байгаагаа илэрхийллээ. Египет улсын гадаад  хэргийн сайд Самех Шукри НҮБ-ын палестинд туслах агентлагийн санхүүжилтийг зогсоож байгаа нь Газын зурвас дахь иргэдийг санаатайгаар өлсгөх гэсэн системтэй бодлого гэж үзэж байгаагаа илэрхийлсэн байна. Иордан улсын гадаад хэргийн сайд Аяман Сафади мөн өөрийн цахим хуудсаар дамжуулж, “12 ажилтны эсрэг үүсгэсэн хэргийн төлөө 2 сая палестин иргэн шийтгүүлэх ёсгүй” гэж бичиж нийтэлжээ.

Одоогийн байдлаар НҮБ-ын тус агентлагийн 58 дүрвэгсдийн хуаран Газын зурвасаас гадна Иордан, Ливан, Сири, Иордан голын баруун эрэгт үйл ажиллагаагаа явуулж, палестинчуудад тусалж байна.