УИХ-ын гишүүн асан Т.Аюурсайхан, Эрдэнэс Тавантолгой ХК-ийн гүйцэтгэх захирал асан Б.Ганхуяг нарын 11 хүнд холбогдох Нүүрсний гэх тодотголтой хэргийн гэм буруугийн шүүх хуралдаан өнөөдөр /2024 оны 01 дүгээр сарын 15/-ны өдөр товлогдсон.  Баянзүрх, Чингэлтэй, Сүхбаатар дүүргийн Эрүүгийн хэргийн анхан шатны шүүхэд 2023 онд 5 удаа эхэлсэн ч хойшилсоор байгаа энэ хэргийн яллагдагч нар өнөөдөр шүүхийн танхимд 6 дахь удаагаа орно.

Тодруулбал, Нийслэлийн Прокурорын газраас Т.Аюурсайхан, Б.Ганхуяг, Т.Түвшинбаатар, Х.Батхишиг, О.Данзанлувсантүдэв, Б.Отгонжаргал, Г.Гантөмөр, О.Дагвадорж, И.Даваадорж, П.Бадамханд, Б.Эрдэнэбаяр нарт яллах дүгнэлт үйлдэж шүүхэд ирүүлээд байгаа юм.

Хамгийн сүүлд эрүүгийн хэргийн гэм буруугийн шүүх хуралдааныг 2023 оны 12 дугаар сарын 27-ны өдөр товлон зарласан боловч шүүгдэгч Б.Отгонжаргал эрүүл мэндийн шалтгааны улмаас шүүх хуралдаанд ирээгүй тул шүүх хуралдааныг 2023 оны 01 дүгээр сарын 15-ны өдрийн 09 цаг хүртэл хойшлуулж, шүүгдэгч нарт урьд авсан цагдан хорих болон хувийн баталгаа гаргах таслан сэргийлэх арга хэмжээг тус тус хэвээр үргэлжлүүлж шийдвэрлэсэн юм.