Өмнөд Африкийн Бүгд Найрамдах улс Израил улсыг Газын зурвас дахь палестинчуудын эсрэг геноцид буюу хоморголон устгах ажиллагаа явуулж байна гэж буруутгаж, НҮБ-ын системийн байгууллага болох Олон улсын шүүхэд энэ хэргийг авч хэлэлцэхийг хүссэн.

Үүний дагуу Олон улсын шүүхээс энэ хэрэг дээр сонсгол эхлүүллээ. Өмнөд Африкийн зүгээс Израилыг геноцид үйлдэж байгаа гэдгийг нотлох 13 долоо хоногийн турш үргэлжилсэн дайны нотлох баримт байгаа гэж үзэж байгаа бол Израилын талаас өөрсдийнх нь эсрэг үүсгээд байгаа хэргийг тууштай эсэргүүцэж, Олон улсын шүүхийг нэг талыг барьсан шударга бус үйлдэл хийж байна гэж хариу буруутгажээ.

Палестинчуудын геноцидын талаарх хэргийн сонсгол Нидерланд улсын нийслэл Хааг хотноо Энх тайвны ордонд болж байна. Уг сонсголын үеэр Өмнөд Африкийн хуульч одоо Газын зурваст болж байгаа дайн бол Израилын хэдэн арван жилийн хугацаанд палестинчуудын эсрэг явуулсан дарангуйллын нэг хэсэг гэж эхний байр сууриараа илэрхийлсэн байна.

Харин Израилын Ерөнхий сайд Биньямин Нетаньяху энэ хэргийг эрс эсэргүүцэж байгаагаа илэрхийлж, "Хамас" бүлэгтэй үргэлжлүүлэн дайтсаар байх болно гэдэг байр суурийг хатуу илэрхийлж байна.

Израил руу чиглэсэн геноцидтой дайтаж байгаагийнхаа төлөө биднийг геноцид үйлдсэн гэж буруутгалаа гэж тэрбээр видеогоор дамжуулж байр сууриа илэрхийлсэн юм.

Израил улсын Ерөнхий сайд Биньямин Нетаньху "Хорвоо дэлхий хаашаагаа эргээд байна вэ. Гэм зэмгүй ард түмнийг хохироохоос бүх хүчин чадлаараа зайлсхийж ирсэн Израилын батлан хамгаалах армийг геноцит үйлдэгч мангас гэж үзэх гэж. Биднийг геноцитын хэрэгт буруутгаж байгаа Өмнөд Африк улс хоёр нүүртэй улс юм. Сири болон Йеменд хэдэн сая хүн "Хамас" бүлгийн довтолгоонд өртөж, алагдаж, орон гэрээсээ дайжиж байхад Өмнөд Африк улс хаана байсан юм бэ" гэж ярьжээ. 

Харин Өмнөд Африкийн хуулийн багийнхны зүгээс Израилын үйлдэж байгаа геноцитын гэмт хэргийг олон улсын хэм хэмжээнд тулгуурлаж, ямар ямар зүйл заалт зөрчиж, үйлдсэн болохыг Хааг дахь сонсголын үеэр танилцууллаа.

ӨАБНУ-аас Нидерланд улсад суугаа Элчин сайд Вусимузи Мадонсела "Израил улс олон улсын геноцитын гэмт хэргээс урьдчилан сэргийлэх конвенцын 2-р бүлэгт заасанчлан бүлгээр устгах, нийгмийн бүлгийн гишүүдэд биеийн болон оюун санааны ноцтой гэмтэл учруулах, нийгмийн бүлгийн гишүүдийн амьдралын нөхцөлийг бүхэлд нь болон хэсэгчилж устгах, нийгмийн бүлгийн гишүүдийг цаашид үр удмаа үлдээхээс сэргийлэх гэсэн тодорхой нэг бүлэг рүү чиглэсэн геноцитын гэмт хэргийн шинж чанартай үйлдлүүдээ зогсоох ёстой. Мөн олон улс дахь гэрчүүдийн мэдүүлгийг үл тоож, үгүйсгэх ёсгүй" гэжээ.

Үүнээс гадна Өмнөд Африкийн Бүгд Найрамдах улсын хуулийн баг бүрэлдэхүүн Израилын Газын зурваст явуулсан довтолгоог тоо баримттай танилцууллаа.

"Хамас" бүлэг өнгөрсөн оны аравдугаар сард Израил руу халдан довтолж дайн эхэлснээс хойш эхний нэг долоо хоногт л гэхэл Израил улс Газын зурвас руу 6000 бөмбөг хаяжээ.

Үүний 2000-ыг нь 200 удаагийн довтолгоогоор Газын зурвасын өмнөд хэсэг рүү хаясан. Газын зурвасын өмнөд хэсэг бол Израилын довтолгооноос ангид, аюулгүй хоргодох газар байх ёстой байсан гэдгийг Өмнөд Африкийн төлөөлөгч мэдээлсэн юм.

Мөн дээр дурдсанчлан Олон улсын геноцитын гэмт хэргээс урьдчилан сэргийлэх конвенцын 2-р бүлэгт заасны дагуу Израил улс Газын зурвасыг бөмбөгдөж, одоогийн байдлаар 23 мянга гаруй хүн амь насаа алдсан байна.

Газын зурвасын 90 гаруй хувь бүхэлдээ бөмбөгдөлтөд өртөж, хоргодох орон байраас авахуулаад ус, хоол хүнс, хүмүүнлэгийн тусламж, түлш, хувцас хэрэгсэл, ариун цэвэр, халдваргүйжүүлэлт, эмнэлгийн хэрэгсэл, тусламж зэрэг наад захын амьжиргааны хэрэгцээгээр хангагдаж чадахгүй нөхцөлд байна.

Мөн амиа алдсан нийт энгийн иргэдийн дийлэнх нь хүүхдүүд байгаа нь олон улсын конвенцын дагуу цаашид үр удмаа үлдээхээс нь урьдчилан сэргийлэх ажиллагаа явуулсан гэдэг зүйл заалттай яг таарч байна гэж хэрэг үүсгэсэн Өмнөд Африкийн Бүгд Найрамдах улсын зүгээс үзжээ.