Дэлхийн усан тээврийн хамгийн чухал бүс болох Улаан тэнгист өнгөрсөн оны 11 дүгээр сараас хойш түрэмгийлэл үйлдэж, ачаа тээврийн онгоцууд руу халдаж байгаа Йемений Хуситуудын байршиж байгаа хэд хэдэн газар руу АНУ болон Их Британийн агаарын хүч довтолж эхэлсэн байна.

Энэ довтолгооны талаар АНУ-ын Ерөнхийлөгч Жо Байден албан ёсны мэдэгдэл гаргаж, “Далайн усанд чөлөөтэй зорчих олон улсын хэм хэмжээнд Хуситууд халдсаар байвал АНУ бүхий л талын арга хэмжээг авна гэдгийг энэ удаагийн довтолгоо тодорхой харууллаа” гэж мэдэгдсэн байна.

Их Британийн Батлан хамгаалах яамны зүгээс уг довтолгоогоороо Хуситуудаас ирэх аюулыг түр намжааж чадлаа гэж мөн мэдэгджээ.

Йемений Хуситууд нь Ираны дэмжлэгтэй гэж олон улсад танигдсан исламын Шиа урсгалын босогч бүлгэм юм. Йемений Засгийн газартай дотооддоо мөн байнгын мөргөлдөөн иргэний дайнтай байдаг.

Өнгөрсөн оны аравдугаар сард Палестины "Хамас" бүлэг Израил руу довтолж, Газын зурваст дайн эхэлснээс хойш удалгүй "Хамас" бүлгийг дэмжиж байгаагаа илэрхийлж, Улаан тэнгист зорчиж яваа Израилын холбоотон гэж өөрсдийн дүгнэсэн иргэний ачаа тээврийн хөлгүүд рүү халдах болсон.

Улмаар олон улсын усан тээврийн аюулгүй байдал, нийлүүлэлтийн гинжин хэлхээнд аюул учрууллаа гэж харсан АНУ, Их Британи тэргүүтэй 12 улс эвсэл байгуулж Хуситуудын эсрэг зайлшгүй арга хэмжээ авна гэж мэдэгдэж эхэлсэн юм.

Тэгвэл ийнхүү АНУ болон Их Британийн агаарын хүч Йемен улсын нутаг дэвсгэр даяарх Хуситуудын байршлуудыг бөмбөгдөж эхэллээ.

Хусит босогчдын бүлгэмийн зүгээс мэдээлснээр бол Америк-Британийн хүч Йемений нийслэл Сана хот болон Саада, Дамаар, Ходейда зэрэг хотыг бөмбөгдсөн байна.

Мөн энэ довтолгоог Америк-Еврей-Британийн нэгдсэн түрэмгийлэл гэж нэрлэж буй юм байна. Газын зурвасын Израил-Хамасын дайн аль хэдийн бүс нутагт халин тархаж эхэлсний нэг хэлбэр энэ мөн гэж зарим олон улсын агентлаг бичиж нийтэлжээ.

АНУ-ын нэрээ нууцалсан нэгэн албаны эх сурвалжийн мэдээлснээр Америк-Британийн хүч дахиад хэдэн арван Хусит бүлгэмийн байршлыг онилоод байгаа, тэдний зүгээс бэлгэ тэмдгийн шинж чанартай довтолгоо бус Хуситуудын цэргийн хүчийг баттай сулруулах зорилгоор довтолж байгаа гэж мэдээлсэн байна.

Хуситуудын Улаан тэнгис дэх дайралтыг АНУ тэргүүтэй 12 улс буруутгаад зогсохгүй НҮБ-аас мөн довтолгоогоо зогсоохыг шаардсаар байгаа. Өнгөрсөн 3 сарын хугацаанд Хуситууд Улаан тэнгист зорчиж явсан 27 онгоцыг бөмбөгдсөн.

Нэгдүгээр сарын 9-ний өдөр гэхэд Хуситууд Улаан тэнгис дэх Адены булангийн олон улсын усан тээврийн зам руу хөлөг эсэргүүцэгч баллистик пуужингаар харвасан нь өнгөрсөн хугацаан дахь хамгийн том довтолгоо гэж тооцогдож байна.

АНУ-ын Ерөнхийлөгч Жо Байден тэр дундаа Хуситууд Америкийн хөлгийг голчилж онилж дайрч байна гэж албан мэдэгдэлдээ дурдсан байна.

Улаан тэнгис нь дэлхийн нийт усан тээврийн 15 хувь зорчин өнгөрдөг чухал бүс нутаг юм.