Чингис хаан Үндэсний музейд 2024 оны нэгдүгээр сарын 8-нд “Монголын шуудангийн түүх” үзэсгэлэн, “Луу жил” сэдэвт шинэ маркийн анхны өдрийн нээлтийн ёслол боллоо.

Ёслолын үйл ажиллагааг нээж "Монгол шуудан" ХК-ийн Марк, үнэт цаасны хэлтсийн дарга Б.Дамдинбазар, Чингис хаан Үндэсний музейн захирал, академич С.Чулуун, Монголын филателийн холбооны ерөнхийлөгч, МУСГЗ Ч.Энхбат нар үг хэлэв. 

Монгол маркийн 100 жилийн ойн хүрээнд XVII жарны “Хилэнт эх” хэмээх модон луу жилд зориулсан “Луу жил” сэдэвт хоёр нэрийн марк нь Архангай аймгийн Өндөр-Улаан сумын нутгаас олдсон лууны бүтэн дүрс бүхий Ази тивийн анхны олдвор Хос мөнгөн лууг дүрсэлсэн байна. Маркийг бүтээхэд Түвдэнпэлжээлин хийдийн хамба лам, гэвш, МУСГЗ Ж.Гончигсүрэн, зурхай судлаач, дэд профессор С.Даваабаяр, МУСГЗ, археологич, түүхч, доктор, профессор Д.Эрдэнэбаатар нар мэргэжлийн зөвлөгөө өгч, холбогдох зураг, материалаар тусалсан бол маркийн зураачаар Г.Баттөр, дизайнераар Ж.Ганхуяг нар ажиллажээ. 

Монголын филателийн холбооны ерөнхийлөгч, МУСГЗ Ч.Энхбатын “Монголын шуудангийн түүх” үзэсгэлэнд монголчуудын олон зуун жил хэрэглэж ирсэн морин өртөө шуудангаас бие даасан шуудангийн системд шилжсэн түүхийн нэн ховор баримтууд дэлгэгджээ. 

Тус үзэсгэлэн Чингис хаан Үндэсний музейн VI давхарт 7 хоног үргэлжилнэ.